“No ID, No Entry Policy” Gipatuman sa City Hall Sugod Karung Adlawa

(Cebu City PIO) — Gihangup ni Mayor Michael L Rama ang bag-ong polisiya sa hepe sa Civil Security Unit (CSU) nga si Col. Ranullfo Sebusa sa pagpatuman og “No ID, No Entry Policy” alang sa mga mosulod ug adunay transaction sa mga buhatan Cebu City Hall sugod karung adlawa.

Gipadayag ni Rama ang iyang pag-uyon sa maong lakang nga gipatuman karun sa mga blue guards sa city hall nga kinahanglang adunay valid ID ang mga tawo nga musulod sa buhatan ug mosulat sa ilang mga pangalan sa log book kun ugaling wala kini makadala og ID.

“That will be good, because that will bring in some people to be cautious, basta it will be apply to all,” pagpatin-aw ni Rama dihang gipangutana sa media.

Giawhag ni Rama nga ipatuman kini lakip na sa mga kawani ug opisyales gani gikuha gilayon ni Rama ang iyang city hall ID arun isul-ob kini dayun og awhag sa mga sakop sa media nga magdala usab sa ilang company ID arun dili makasinati og mga kakulian.

Dihang gikuhaan og reaksiyon ang pipila ka mga kawani, giangkon nila nga nahiuyon ra sila sa bag-ong polisiya diin gisukaran niini nga makabaton og hapsay ug luwas ang mga buhatan hilabi na nga nasinati og pagkawala sa mga personal nga butang sa mga kawani sa nakalabay’ng buwan.

Nasayran nga nakalitan ang mga musolod sa city hall sa bag-ong polisiya gani sigon sa obserbasyon, nakamugna kini og dyutay nga linya sa mga mosulod ug adunay transaksiyon sa city hall.

Tungod niini, gikinahanglang adunay ikapresentar nga valid ID ang mubisita sa Cebu City Hall ug mahibaw-an ang tumong ug katuyuan niini.

Hugot nga gipatuman ang maong palisiya human na-alarma ang buhatan sa panghitabo sa pagkawala sa mga kabtangan sama sa mga motorsiklo nga giparking atubangan sa Cebu City Hall. (Cebu City Public Information Office PIO/Germaine Garces and Robert Allonar, CNU Communication Interns/elite)