NNC Mopahigayon og Operation Timbang

Nangandam ang National Nutrition Council (NNC) sa Central Visayas sa pagpahigayon og “Operation Timbang” sa kabataan sa Central Visayas sulod niining tuiga.

Kini aron pagtino kun may kamatuoran ba ang ilang pagduda nga usa sa mga dakong hinungdan sa pag-ubos sa nutritional status sa mga kabataan karon, ilabina sa mga pre -schooler dinhi sa Central Vsiayas, mao ang linog nga mitay-og sa Cebu ug Bohol ug ang bagyong Yolanda nga miigo sa miaging tuig.

Sumala ni Susan Orpilla, hepe sa NNC-7 nga sigon sa gipahigayon nga survey sa Food Nutrition Research Institute (FNRI) mikibra ang konsumo sa mga kabataan sa prutas ug utanon niinging tuiga.

Iyang gitataw nga dako ang posibilidad nga usa sa mga hinungdan niini mao ang nahitabong duha ka dagkong kalamidad sa miaging tuig nga midaot sa mga kaumahan sa prutas ug utanon.

Gumikan niini minihit ang supply sa utanon ug prutas sa Central Visayas ug misaka usab sa prisyo niini sa kamerkadohan.

Nasuta usab ni Orpilla nga gumikan sa kakuwang sa supply sa prutas ug utanon, mibalhin ang mga kabataan sa pagkaon og mga human daan pagkaon, sama sa noodles, canned goods ug mga junk foods nga dili haum alang sa pagbaton og himsog nga lawas sa mga kabataan.