NMIS: Pagbantay sa ‘Double Dead Meat’

Subling gipahimangno sa National Meat Inspection Service (NMIS) ngadto sa publiko nga magbantay sa mga double dead meat niining panahon sa summer.

Kini tungod sa kainit sa panahon karon nga posibling maka-heat stroke ug ikamatay sa baboy, baka ug uban pang hayop.

Unya pahimuslan usab kini sa mga mapahimuslanong negosyante og karne pinaagi sa pag-ihaw sa masakiton o patay na’ng daan ug ibaligya ang karne niini sa merkado.

Ang buhatan ni Joel Elumba, ang OIC Regional Technical Director (RTD) for research and regulatory affairs sa DA-7 nagtumbok nga gidili sa balaod ang pag-ihaw sa masakiton ug himatyon o patay na nga hayop.

Kini tungod kay makadaot na sa panglawas sa tawo ang maong matang sa karne nga gikan sa masakiton ug double dead nga hayop.

Hinuon ang DA-7 wala pay nadawat nga report bahin sa nangamatay nga hayop gumikan sa kainit sa panahon.

Apan ang mga opisyal sa NMIS nagpahigayon og subsob nga inspection sa kamerkadohan uban sa city ug municipal veterinarians aron pagsiguro nga luwas kan-on ang mga karne nga gibaligya sa sa maong mga lugar.

Gibauran hinuon niini ang mga konsumedor nga magmatngon sa paliton niining karne pinaagi sa pagtino nga dili double dead meat ang ilang mapalit.

Sayon ra ilhon ang karne nga double dead o masakiton pinaagi sa hitsura niini ug sa prisyo nga barato ra itandi sa mga limpyo nga karne.

Wala usay certification sa NMIS ang mga pinayuhot nga karneng masakiton ug double dead tungod kay dili kini itugot sa maong ahensya.

Samtang ang kadagkuan sa NMIS mipagawas usab og pahimangno ngadto sa mga negosyante og karne nga pahamtangan sila og multa gikan sa P600 mil hangtud sa P1 milyon sa higayon nga masakpan sila nga namaligya og double dead nga karne.

Gawas niini, posibli usab nga kuhaan sila og lisensya sa pagpamaligya og karne aron dili na sila makahimo pa ug susamang salaod.