NFA7: ‘Commercial Rice’ Nagpabiling Mahal

●Sukwahi sa pagtuo nga mokunhod ang presyo sa bugas kay panahon karon sa ting-ani ug daghan ang supply niini.

Giangkon sa National Food Authority (NFA)-7 nga nagpabiling taas ang presyo sa commercial rice sa kamerkadohan sa Sugbo.

Kini sukwahi sa pagtuo sa NFA-7 nga mokunhod ang presyo sa bugas kay panahon karon sa ting-ani ug daghan ang supply sa commercial rice.

Sigon pa sa tigpamaba sa NFA-7 Ma. Lucia Rosales nga base sa ilang monitoring ang labing maayong klase sa humay sama sa Ganador anaa gihapon sa tag- P50 kapin ang matag kilo.

Kini tungod kay taas ang kantidad sa puhonan sa mga negosyante niini gikan sa tinubdan sama sa Isabela ug Mindoro.

Apan bisan paman niini, si Rosales mihulagway nga “tolerable” ra ang pagsaka sa prisyo sa maong klase sa bugas tungod sa pagmahal sa prisyo sa ilang pagpalit sa tipasi niini nga tag P22 matag kilo.

Hinuon gitumbok ni Rosales ang prisyo sa NFA rice sa kamerkadohan nga nagpabilin sa P27 matag kilo ug giaghat niini ang mga konsumedor nga angay mopalit sa NFA rice aron makadaginot.