NFA Uyon sa P2 nga Usbaw sa Presyo sa Bugas

Nasigpatan dayon sa mga konsumedor sa syudad sa Sugbo ang P2 nga usbaw sa presyo sa bugas humay matag kilo sa kamerkadohan, Apan ang National Food Authority (NFA-7) daling midepensa sa maong isyu.

Sigon pa sa tigpamaba sa NFA nga si Ma. Lucia Rosales nga makiangayon ra ang P2.00 nga usbaw sa prisyo sa bugas humay bisan kun panahon karon sa ting-ani.

Kini tungod kay mao pay pagsugod sa ani sa mga kahumayan sa nagkadaiyang probinsiya sa nasud, hinungdan nga wala pa makaabot sa kamerkadohan ang mga commercial rice.

Giangkon ni Rosales nga sa pagkakaron, halos wala nay sulod ang mga bodega sa tig-supply og bugas sa kamerkadohan tungod sa kanihit sa gitumod niini dinhi sa Sugbo.

Apan gipaniguro ni Rosales nga sa sunod semana dili na mosaka ang prisyo sa bugas humay tungod kay ila nang gisugdan sa pagpabaha sa NFA rice ang kamerkadohan .

Matud pa ni Rosales nga ang maong mga bugas gikan pa sa nasud sa Vietnam nga gi-import sa NFA.

Iyang gipahibawo nga mikabat sa 1.3 ka milyon ka sako sa bugas ang gigahin sa Central Visayas lamang busa dili mahitabo nga magnihit ang supply niini sa kamerkadohan niining mosunod nga mga bulan.