NFA Nagproblema’g Bodega nga Kapundoha’g Bugas

Ang kadagkuan sa National Food Authority (NFA-7) mitug-an nga naproblema sila sa bodega nga kabutangan sa mga liboan ka sakong bugas nga gitagana alang sa Leyte ug Samar nga gikusokuso sa bagyong Yolanda sa miaging tuig.

Kini tungod kay wala pa maayo ang mga bodega sa NFA sa Leyte, Samar ug ubang lugar sa rehiyon 8 nga nagusbat sa bagyo.

Ang tigpamaba sa NFA-7 Ma. Lucia Rosales nagkanayon nga nanginahanglan sila og dugang bodega nga kapundohan sa idiskarga nga 1.3 ka milyon ka sakong bugas humay.

Kini maoy giimport sa kagamhanan gikan sa nasud sa Vietnam alang lamang sa Visayas.

Hinuon gitumbok ni Rosales nga ang ilang buhatan padayon nga nakig-alayon sa mga tig-supply og bugas sa kamerkadohan aron may magamit silang mga bodega.

Subling gipasalig niya nga ang Kabisay-an may igong supply sa bugas niining mosunod nga mga bulan kay panahon na man usab sa ting-ani.

Gawas sa mga local nga commercial rice, ang ilang buhatan mopadayon usab sa pagbaligya sa mga NFA rice ngadto sa mga kamerkadohan aron may kapilian ang mga kabus nga makapalit og bugas sa minus og prisyo, sumala ni Rosales.