NFA-7: Adunay 250 mil ka Sakong Bugas Nangabot

Gibutyag sa National Food Authority (NFA)7 nga may dugang imported nga bugas humay ang miabot sa Sugbo gikan sa Vietnam alang sa tanang probinsiya sa Central Visayas.

Si Public Information officer Maria Lucia Rosales sa NFA7 miingon nga mikabat sa kapin sa 250 mil ka sakong bugas ang miabot niadtong miaging semana nga gikarga sa duha ka mga barkong langyaw gikan sa Vietnam.

Usa sa maong mga barko mikarga og 134 mil ka sako, samtang ang laing usa mikarga usab og 120 mil ka sako.

Midugang si Rosales nga dili kuwangon sa pagkaon ang Central Visayas tungod kay may katapusan pang kargamento sa bugas humay gikan gihapon sa Vietnam nga gitakdang moabot karong Oktobre 4 alang gihapon dinhi sa rehiyon 7.

Human niini, mangani na usab ang mga mag-uuma og humay sa nasud sa maghinapos ang mga buwan ning tuiga.

Gipasabot ni Rosales nga ang maong gidaghanon sa imported nga bugas maoy pagsiguro nga dili kahutdan og supply sa bugas humay ang kamerkadohan dinhi ug ingon man dili na usab mosaka pa ang presyo niini.

Gipasalig usab ni Rosales nga pabahaan sa ilang buhatan og mga NFA rice ang kamerkadohan aron makapalit bisan ang mga kabus sa de kalidad nilang bugas sa barato nga presyo.

Mipasidaan usab si Rosales sa tanan nga mo-report ngadto sa ilang buhatan nga kutob sa mga negosyante nga ilang masakpang mamaligya og NFA rice nga lahi sa presyo nga gitugot sa buhatan sa NFA ug kadtong manipig niini, pahamtangan nila og bug-at nga silot.