NBI-7 Mopasaka’g Kaso Batok HPG-7

Gitinguha sa National Bureau of Investigation (NBI-7) nga mapasaka karong semanaha ang kasong multiple murder ug frustrated murder batok sa mga opisyal sa Highway Patrol Group (HPG-7) nga may kalambigitan sa pagbanhig patay kang Atty. Noel Archival ug mga kaubanan didto sa Coro, Dalaguete niadtong nakalabay nga bulan.

Kini kun magdumili sa pagsanong sila si HPG-7 Head Supt. Romualdo Iglesia , Sr. Insp. Eduardo Mara, Sr. Inps. Joselito Lerion ug SPO4 Edwin Galan sa summon sa NBI nga nagmando sa pagtubag sa kalambigitan niini sa kasong pagpatay ni Atty. Archival ug mga kaubanan.

Sigon pa sa bag-ong regional director sa NBI-7 nga si Atty. Max Salvador, importante kaayo ang tubag sa naasoy nga mga akusado alang sa ilang pagsang-at og asunto ngadto sa buhatan sa provincial prosecutors’ office.

Apan iyang gitataw nga mapugos sila sa pagsang-at dayon sa maong kaso ngadto sa buhatan sa piskaliya sa higayon nga ibaliwala sa HPG-7 officials ang gipadalang summon.

Gipaniguro hinuon sa director sa NBI-7 nga ang ilang buhatan mosubay gihapon sa tukmang proseso sa pagpalig-on ug pagpasaka sa maong kaso.

Nasayran nga niadtong nakalabay nga adlaw, gikuha sa NBI-7 ang usa ka sakyanan nga Toyota Vios nga may plate number GSC 675 didto sa impounding area sa HPG-7.

Kini base sa nakuha nila nga search warrant sa korte nga gipirmahan ni RTC-7 Executive Judge Soliver human matumbok nga mao kini ang usa sa mga sakyanan nga gigamit sa mga suspetsado sa pag-ambush patay ni Atty. Archival ug mga kaubanan.

Samtang kusganong gipanghimakak sa tigpamaba sa HPG-7 nga si Sr. Insp. Oliver Plania nga nagtago-tago ang ilang labaw tungod sa naasoy nga kaso, iyang gipasabot nga ania pa gihapon sa Sugbo si Supt. Iglesia apan wala una kini makatunga sa ilang buhatan tungod kay may giasikaso nga mga butang nga may labot sa trabaho isip labaw sa HPG-7.

Gitumbok usab niya nga si Supt. Iglesia ug mga kaubanan nga gidudahang maoy suspetsado sa pagpusil patay ni Atty. Noel Archival andam kaayo nga moatubang sa NBI ug motubag sa naasoy nga kaso.

Image Credit: cebudailynews.inquirer.net