Napolcom Mitakda’g Petsa Alang sa Eksamin Pagka-Polis

Subling gipahibalo sa National Police Commission (NAPOLCOM) 7 nga mahimong ipaagi sa ilang On-Line Examination Application Scheduling System (OLEASS) ang application sa buot mo-apply sa pagka-polis.

Ang on-line filing sa application alang sa eksaminasyon sa Philippine National Police Entrance Examination (PNPEE) gitakda sa Agusto 11-15, 2014 samtang ang PNP Promotional Examinations (PNP) ipahigayon usab sa August 18-22, 2014, sumala ni NAPOLCOM 7 Director Homer Marianoi Cabaral.

Nagkanayon si Cabaral nga sukad pa niadtong tuig 2012, ang NAPOLCOM migamit na niining OLEASS alang sa pagpanawat og mga aplikasyon gikan sa mga aplikante kinsa gusto nga mag-polis o kaha polis nga buot makabaton og promosyon.

Midugang si Cabaral nga ang maong sistema gituyo sa pagmugna sa matag rehiyonal nga buhatan sa kapolisan aron kalikayan ang tag-as unya nga linya sa mga aplikante.

Giklaro usab sa hepe sa NAPOLCOM 7 nga ang mga aplikante lamang nga may confirmed schedule sa appointment ug may reference number na ang tugotan sa ilang buhatan nga makahikay sa ilang application gikan sa Septembre 1 – 30, ning tuiga.

Miingon si Cabaral nga tungod sa ka limitado sa ilang rekurso, gilimitihan usab nila ang gidaghanon sa mga aplikante nga ilang dawaton aron makasalmot sa eksaminasyon.

Kun masuta nila nga makaabot na sa gidaghanon nga ilang gikinahanglan, mohunong usab sila sa pagpanawat og mga aplikante bisan wala pay deadline.

Gani, midugang si cabaral nga himoon nila ang pagpanawat sa mga aplikante pinaagi sa “First Come ,First Served” basis.

Ang PNP Entrance and Promotional Examinations gitakdang ipahigayon sa tibuok rehiyon unya sa November 9, 2014.

Ang buot mosalmot niini, mahimong mobisita sa official website sa NAPOLCOM nga www.napolcom.gov.ph o kaha sa www.napolcom.online.com dayon i-click ang OLEASS ug fil- apan ang mga blangko sa application form nga angay fil-apan.

Dayon inighuman og fill-up i-click ang submit ug paabuton ang confirmation sa computer niini.

Kun ugaling pakyas sa pag-register, kinahanglan nga mobalik ang aplikante sa naasoy nga proseso.