Nanghagit og Sukmagay sa Sakop sa CESET, Gidakop

Duha ka magsuon gidakop sa mga polis kay matud pa nanghagit og sukmagay ug nanghulga sa usa ka kawani sa City Hall nga moisyu unta kanila og citation ticket tungod sa paglabay og basura nga wala gilain ang madugta ug dili madugta.

Ang gidakop ug gitanggong karon sa Mabolo Police Station mao sila si Samuel Limoran, 42, ug si Junrey Limoran, 33, pulos mga minyo ug nagpuyo sa Sitio Maracas, Barangay Lahug.

Si Grace Luardo, hepe sa Cebu City Environmental Sanitation Enforcement Team (CESET), miingon nga ang iyang sakop nga si Tranquilino Berdin miuban sa garbage truck nga mihakot og basura didto sa Sitio Maracas kaniadtong Martes sa gabii.

Nasakpan ni Berdin si Junrey Limoran nga milabay’g basura nga wala ma-segregate mao nga iya kini’ng gipangutana sa iyang ngalan apan nagdumili sa pagtug-an ug midagan.

Matud ni Luardo nga gigukod ni Berdin ang maong tawo ug nadakpan apan diha’ng isyuhan na unta og citation ticket tungod sa paglapas sa ordinansa nga nagdili paglabay og basura nga wala ma-lain ang malata ug dili malata, midagan na usab ug nakasibat.

Si Luardo miingon nga pagkataud-taud ang tawo mibalik nga may kauban na ug ang kamot niini nagkuot sa bulsa nga makapaduda nga aduna kini gigunitan nga armas.

Ang managsuon giingong nanghagit og sukmagay ni Berdin mao nga ang sakop sa CESET dali nga nanawag og polis nga misangpot sa pagkasikop sa magsuon.