Nangahadlok Sa Cancer

Daghang lumolopyo sa usa ka sitio sa Barangay Apas nangahadlok karon nga matakboyan sila’g sakit nga cancer ug mangamatay tungod sa pag-operate og cell sites tower sa ilang lugar.

Ang mga lumolopyo nga sakop sa Calvary Hills Apas Residents Organization (CHARO) nga gipangulohan ni Porponio Lapa Jr., miingon nga pipila sa iyang mga silingan nasakit na og cancer ug ang uban namatay.

Matud ni Lapa nga nabalaka gayud ang iyang mga sakop nga tungod sa grabe’ng radiation gikan sa cell site tower makamugna kini og sakit ngadto kanila.

Gusto sa mao nga mga lumulopyo nga kuhaon sa Globe Telecom ang duha ka cell site tower sa Sitio Calvary nga nahimutang sa bungtod nga bahin sa Barangay Apas.

Kaniadtong unang semana sa buwan sa Enero, ang mga hingtungdang lumulopyo mipirma og pitisyon og ilang gipadala sa National Telecommunications Commission (NTC) aron mandoan ang Globe nga kuhaon sa ilang dapit ang tower.

Ang mga opisyal sa barangay Apas nga gipangulohan ni Kapitan Ramil Ayuman miawhag na sa Department of Health (DOH) nga hatagan og katin-awan kon makadaut a gayud sa panglawas sa mga tawo kon magpuyo duol sa cell sites.

Ang Cebu City Council miawhag sa mga sakop sa Committee on Utilities nga moapil paghimo og pagtagad sa reklamo sa mga taga Sitio Calvary sa Barangay Apas.

Matud ni Kapitan Ayuman nga ang mao nga cell sites natukod nga dili pa siya ang kapitan sa barangay.