Nagtuong Gihiloan, Namusil

Tulo ka tawo ang gipatay ug laing usa ang naangol diha nga sila gipangpusil sa ilang silingan nga nagtuo nga siya gihiloan sa usa sa mga biktima.

Human ang mga biktima gipangpusil, ang suspetsado nga si Renato Cabradilla, 30, nagpuyo sa Barangay Buot, bukid nga bahin sa dakbayan sa Sugbo, misaka og lubi aron dili siya mabawsan sa mga paryente sa iyang gipatay.

Ang mga gipangpatay mao ang magsuon nga Jeffrey Cabucayan, 23 ug Jerome Cabucayan, 19, ug ang ilang silingan nga si Gerardo Tangayan, 46. Naangol usab ang 16-anyos nga anak ni Tangayan.

Si Cabradilla nanaog ra usab hinuon gikan sa lubi nga iyang gikatkatan diha nga miabot ang kapolisan. Wala gayud siya magmahay nga gihimo niya ang mao nga krimen, base sa report sa telebision.

Suod nga higala ni Cabradilla ang magsuon nga Cabucayan apan nagtuo siya nga gihiloan siya ni Jeffrey samtang nanaygon sila didto sa Danao sa miagi’ng Disyembre.

Matud ni Cabradilla nga nag-anam siya og kahigos, miniwang, ug nagtuo siya nga hapit na siya mamatay mao nga nakahukom nga patyon niya ang responsable sa iyang kahimtang.

Ang biktima nga si Tangayan didto ra sulod sa iyang balay pagkadungog sa buto-buto mao nga dali siya nga misusi sa gawas apan giapil siya pagpusil ni Cabradilla ug ang 16-anyos nga anak-dalagita natapsingan sa kilid sa tiyan.

Ang iyaan sa suspetsado nga si Magdalena Ocariza nagtuo nga apilon usab unta siya’g patay kay gipusil siya makaupat ka higayon, apan mikagar ang armas.

Makamao nga manambal si Ocariza gamit ang mga herbal medicines mao nga posible nga nagduda kaniya si Cabradilla nga miapil ang iyang iyaan sa pagbarang kaniya.