Nagpabilin Lang Gihapon sa City Hall?

Hangtod karon, ang kadaghanan niadto’ng siyam ka kawani sa City Hall nga napositibo sa gidili nga matang sa drugas atol sa kinalit nga drug test, anaa pa nagpadayon pagtrabaho sa kagamhanan sa dakbayan.

Gibutyag ni Dr. Alice Utlang, hepe sa City Office for Substance-Abused Prevention (COSAP), nga sa siyam ka kawani sa City Hall nga napositibo sa drug test, ang duha ra kanila ang mitinguha nga ma-rehabilitate.

Hinuon, matud ni Utlang nga ang usa sa duha ka drug positive dili na mahimong kahatagan og laing higayon kay “habitual” na kon nagbalik-balik na lang siya nga namatud-an nga positibo sa gidili nga matang sa drugas.

Matud ni Utlang nga 118 ang tanang kawani sa barangay ug sa Cebu City Hall nga napositibo sa gipahigayon nga drugtest apan ang 24 lang sa mga kawani sa barangay ang mipapailawom og voluntary drug rehabilitation.

Sa 24 ka kawani sa barangay nga mi-undergo og rehabilitation, pito na lang kanila ang milahutay kay ang uban wala na mobalik pagpa-rehabilitate.

Si Utlang mitug-an niini diha nga miatubang siya sa public hearing gihimo sa konseho sa dakbayan.

Misugyot si Utlang nga aduna g’yud unta’y susama nga lagda ang mga opisyal sa barangay kun unsay himuon nila sa mga kawani nga mapositibo sa drugtest.

Ang ubang barangay opisyal sama sa Mabolo diha-diha nga gitaktak nila ang lima ka kawani nila nga napositibo sa drug test, apan ang Brgy. Tinago ug ubang barangay wala nila gitaktak ang mga napamatud-ang adik.