‘Nagaraya Cracker’ Gihaw-as Na Sa FDA

Gisugdan na sa pag-‘pull out’ sa Food and Drug Administration Central Visayas (FDA-7) gikan sa nagkadaiyang tindahan dinhi sa Sugbo ug sa ubang probinsiya sa Central Visayas ang produkto sa Nagaraya Cracker Nuts Original Butter Flavor 160 grams, sugod kagahapon.

Kini base sa kamanduan sa FDA Manila nga nagpahaw-as sa maong produkto gikan sa kamerkadohan human mamatud-i nga may taas nga level sa Aflatoxin, usa sa nag-unang cancinoginic nga butang nga makahatag og sakit nga cancer sa mga tawo nga mokaon niini.

Si FDA-7 Officer-in-Charge Rica Reina Aumentado miiingon nga gi-recall nila ang mga produkto nga may lot number 14019,ug may expiry date nga January 24, 2015 nga gimarka sa putos sa maong produkto.

Aron mas madali ang ilang pagkuha sa maong mga produkto gikan sa mga tindahan, si Aumentado miingon nga ang ilang buhatan makig-alayon na sa mga distributor niini aron dali ra nga matultolan ang mga tindahan nga namaligya sa naasoy nga produkto.

Gipahimangnoan usab niya ang mga konsumedor nga mosusi gyud sa naasoy nga produkto aron dili na kini mapalit pa.

Samtang iyang giawhag ang mga gagmay nga tindahan nga nakapalit sa maong produkto sa paghipus niini ug sa pag-uli usab ngadto sa mga supplier aron sila kaulian sa ilang gibayad.