Motorista Mityabaw sa Maniubra sa CITOM

Mga motorista sa dakbayan sa Sugbo nagbagolbol tungod kay ang City Traffic Operations Management (CITOM) matag buntag nagdumili sa pag-left turn paingon sa “JY Square Rotunda” niadtong mga sakyanan nga gikan sa Sitio Sudlon sa Lahug.
Gihulagway niadtong nagbagolbol nga ang pagdili sa mga sakyanan nga mo-left turn gitumong aron nga dili kaayo mabalda ang pag-agi sa mga sakyanan nga gikan sa JY Rotunda paingon sa direksyon sa Lahug Elementary School.

Mga sakyanan nga gikan sa Sitio Sudlon nga nagtinguha nga modisilya kon moliko paingon sa JY Square mapugos sa pagdemano kon pagliko sa tuo apan sanglit wala may “u-turn slot” nga katuyokan, adto ra usab sila sa unahan mohimo pagliko nga makabalda gihapon sa dagan sa sakyanan.

Pipila ka mga motorista miingon nga ang mao nga dapit dili kaayo makasinati og problema sa kahuot sa mga sakyanan kon ang traffic enforcer nga nadistino sa mao nga lugar maayo lang modumala sa trapiko.

Nabantayan usab sa MetroCebuNews nga daghang mga sakyanan makabalda sa karsada atubangan sa bag-ong gitukod nga Wine Shop diha sa Gorordo Avenue dili layo sa ganghaan sa usa ka Temple.

Mga sakyanan anha iparada sa daplin sa karsada maglumbay gikan sa mga alas siete sa gabii ngadto na sa lawom nga takna sa kagabhion.

Ang dakbayan adunay ordinansa nga nagdili sa pagbaligya og ilimnon nga makahubog sa dapit nga nahimutang sulod sa 100 ka metros gikan sa simbahan, ospital, tunghaan ug mga public plaza. Ang mao nga dapit gihulagway sa uban nga duol ra sa Mormons Temple.