Mokuha ug Cedula Midagsa Sa Cebu City Hall

Ning unang semana sa pagbalik sa trabaho sa kagamhanan ning dakbayan, liboan ka mga katawhan ang midagsa sa Cebu City Hall aron sa paglukat ug Cedula.

“Maayo ang gibuhat sa Cebu City Government kay at least convenient and accessible ug daghang outlet nga mag-serve sa mga molukat ug Cedula,” asoy pa ni Edna Acompanado, 54 anyos, lumad nga taga Barangay Mabolo nga usa lamang sa mga milinya sa Plaza Sugbo aron sa pagkuha ug Cedula.

Sa pakighinabi sa BARUGG News, gibutyag usab ni Menilyn Josol, 28 anyos, taga Barangay Basak San Nicolas nga, “Ok ra kaayo ang inyong gibuhat kay naay mga tents ug lingkoranan samtang naghulat mi sa among torno.”

Ang kagamhanan ning dakbayan nagpahigayon ug pagpang-isyu ug Cedula sa Plaza Sugbo sukad kagahapon Enero 4 unang adlaw sa pagbalik ug trabaho.

Gipasabot ni Diwa Cuevas, hepe sa Cebu City Treasurer’s Office kon CTO nga hangtod daghan pang tawo ang mokuha ug Cedula padayon ang operasyon sa Plaza Sugbo.

“Aduna tay mga tents ug lingkoranan ug lain ang linya alang sa mga Senior Citizens, Persons With Disabilities, ug mga buntis nga mokuha ug Cedula,” asoy pa ni Cuevas

Dugang pa sa hepe sa CTO nga ang mga rekisitos sa pagkuha ug Cedula mao ang mosunod – filled-out application form nga makuha sa area kung asa gipahigayon ang pag-isyu ug Cedula, Alpha list nga gi-isyu sa Kompanya nga gitrabahoan, Certificate of Gross Income sa mga propesyonal, ug Identification Card kon ID.

Giawhag usab ni Cuevas ang tanan nga mokuha ug Cedula sa dili pa ang Pebrero 29, 2016 aron wala kini interest ug penalty.

Ang dakbayan nagpahigayon ug pagpang-isyu ug Cedula sa Plaza Sugbo atubangan sa Cebu City Hall alang sa indibidwal nga mokuha, sa Cebu City Treasurer’s Office alang sa dinaghan nga pagkuha , sa Satellite Office kon City Hall sa Bukid sa Barangay Taptap alang sa mga residente sa kabukirang barangay ning syudad, ug sa SM City Cebu Trade Hall 3 alang sa maglukat ug Cedula nga gamiton sa pagkuha ug pagrenew sa Mayor’s Business Permit karong tuiga.

Ang Cedula kon Community Tax Certificate mao ang Residence Certificate nga gamiton alang sa mga nagkadaiyang transaksyon sa mga buhatan sa gobiyerno og pribadong kompanya.

Ka-usa lamang sa usa ka tuig gikinahanglang mokuha ang mga katawhan niini. Magdepende usab sa ekonomikanhon nga kahimtang sa usa ka magbubuhis ang kantidad sa bayranan sa mokuha ug Cedula. (Cebu City Public Information Office PIO/Greggy Jiggs P. Senados)