Modus sa Kawatan sa Tagbilaran, Gibutyag

Mipasidaan ang Tagbilaran City Peace and Order Council (TCPOC) batok sa bag-ong modus operandi karon sa pundok sa mga kawatan nga naglibot sa maong syudad gamit ang Starex van.

Ang maong grupo nigamit sa maong sakyanan nga maoy isalipod atubangan sa tindahan nga ilang lungkabon ug maoy ilang kargahan sa ilang mga kinawat nga mga butang.

Magsilbi usab ang Starex van nga get-away car sa ilang pag-ikyas.

Atol sa binuwang TCPOC meeting nga gipangulohan ni Tagbilaran City Mayor John Geesnell “Baba” Yap II didto sa Panda Tea Garden sa Dao, Tagbilaran, nasayran nga ang Bohol Bankers Association(BBA) mihangyo na usab alang sa dugang ‘police visibility’ ilabi na sa Carlos P. Garcia(CPG) Avenue diin nahimutang ang daghang mga bangko.

Gipasalig hinuon ni Mayor Yap nga ang kagamhanan sa dakbayan sa Tagbilaran, magbutang gayud og dugang mga closed circuit television(CCTV) camera sa mga nagkalain-laing dapit sa syudad.

Kini agi og dugang monitor sa kagamhanang probinsyal gikan sa team nga gitawag nga Telephone and Radio System Integrated Emergency Response (_TaRSIER 117_).

Gibutyag usab ni Mayor Yap atol sa maong tigom nga ang kapolisan sa dakbayan nakadawat og 30 ka bag-ong service firearms gikan sa nasudnong buhatan sa Philippine National Police (PNP).

Samtang si Tagbilaran City Police Chief Jovito Atanacio mipresentar sa comparative crime statistics alang sa bulan sa Enero ug Pebrero ning tuiga atol sa maong tigom.

Adunay natala nga 96 ka krimen sa Pebrero, samtang 83 niadtong Enero. Samtang adunay 30 ka nasulbad nga krimen sa Pebrero ug 32 niadtong Enero.

Mikabat sa 81 ka index crime ang natala sa Pebrero samtang 66 niini niadtong Enero.

Alang usab sa non-index crimes, may natalang 15 sa buwan sa Pebrero samtang 17 sa Enero.

Ang kapolisan sa syudad adunay 31% crime solution efficiency alang sa bulan sa Pebrero samtang 39% niadtong Enero.

Bahin sa crime against property, nisaka ang insidente sa carnapping sa Pebrero og 15, itandi sa 4 lamang sa bulan sa Enero.