MILF Nagpakita’g Kasinsero?

Ang Malacañang nagkanayon kaganinang buntag nga ang pagpanguli sa mga armas nga gisakmit sa Moro Islamic Liberation Front (MILF) gikan sa nangamatay nga SAF commandos sa Maguindanao usa ka timailhan nga matinud-anon sila sa gitinguhang kalinaw sa nasud.

Apan gikinahanglan pa nga tumanon niini mao ang mga obligasyon nga gihisgutan ni Presidente Aquino sa milabay niyang pamahayag.

“Ang pagsauli ng mga armas ay bahagyang tumutugon sa naunang panawagan ni Pangulong Aquino na magpakita ng kongkretong katibayan ang MILF na sila ay maaaring pagkatiwalaan bilang katuwang ng pamahalaan sa prosesong pangkapayapaan,” matud pa ni Presidential Communications Operations Office Secretary Herminio Coloma Jr. sa press briefing.

Gawas sa gipanguli nga mga armas sa SAF, si Coloma miingon nga angay usab nga paminawon sa MILF ang gihangyo sa Pamuno nasud nga motabang sila sa gobyerno pagsikop kang Basit Usman.

Gawas niini motabang usab ang MILF sa pag-ila ug pagsilot sa mga tawo nga mipatay sa 44 ka mga SAF commandos didto sa Mamasapano ug mikawat sa mga armas niini.

Si Usman kinsa kauban ni Marwan usa ka samaron atol sa ronda didto sa Mamasapano ug nagtago-tago kini karon sa Maguindanao.

Gisukit sa mga reporter kun nagtinguha ba ang gobyerno nga kombinsihon sa MILF ang Bangsamoro Islamic Freedom Fighters (BIFF) nga iuli ang mga armas sa nangamatay nga SAF nga gikawat niini atol sa ilang engkuwentro didto sa Mamasapano, si Coloma nagkanayon nga gusto sa Presidente nga ipakita sa MILF ang kamatinud-anon niini ug anaa na kanila kun maagni ba nila ang BIFF sa pagtahan sa maong mga armas.

Gitahan sa MILF kagahapon ang 16 ka mga armas de fuego nga ilang gisakmit gikan sa mga namatay nga SAF sa duguong kombati tali sa mga rebelding Muslim ug mga SAF nga polis didto sa Mamasapano, Maguindanao niadtong Enero 25.

Ang maong mga armas didto iuli sa Camp Siongco sa 6th Infantry Division sa Datu Odin Sinsuat, Maguindanao, pipila ka semana human sa kombati nga milkalas sa 44 ka mga membro sa Philippine National Police-SAF, 18 ka mga rebelding Moro ug tulo ka mga sibilyan.

Matud pa sa kapolisan nga mikabat sa 63 ka mga armas ang nawagtang atol sa engkuwentro sa Mamasapano.

Atol sa Senate hearing sa miaging semana, ang MILF chief negotiator Mohagher Iqbal misaad nga iuli sa ang maong mga armas de fuego maingon man ang mga butang personal sa namatay nga mga tropa human nila maihap ang mga nawagtang nga mga armas.

Ang BIFF, usa ka grupo nga mibuwag sa MILF ug mibutyag nga nakasakmit kini og 10 ka mga tag-as nga armas gikan sa namatay nga SAF.

Apan mibahad kini nga dili nila iuli ang maong mga armas. Ang mga magbabalaod mibahad usab nga malagmit tungod niini madiskarel ang peace process tali sa gobyerno ug mga rebelding MILF.