MGB: LGU Angay Mangandam sa Umaabot nga Bagyo

Subling giaghat sa Mines and Geo-sciences Bureau (MGB) sa Department of Environment and Natural Resources (DENR)-7 ang mga Local Government Unit (LGU) nga ipatuman ang ilang geohazard advisory nga ilang giluwat ngadto sa upat ka probinsiya sa Central Visayas base sa resulta sa ilang gipahigayon nga geohazards assessment and mapping.

Kini tungod kay nasuta sa MGB nga wala gyuy bisan usa sa mga LGU ang mipatuman niini bisan may pipila na ka mga bagyo niining tuiga nga nagdala og kusog nga ulan.

Si MGB-7 Regional Director Loreto Alburo nagkanayon nga niining taliabot nga bagyong Domeng, angayan nga gipatuman na unta sa nga LGU ang preemptive evacuation sa mga residente nga nagpuyo sa lupa nga lugar nga kuyaw sa baha ug sa bukirang barangay nga delikado usab sa pagdahili sa yuta.

Kini aron masiguro nga gitinguha karon sa nasudnong kagamhanan nga zero casualty sa tagsa-tagsa ka mga lugar inig- abot sa mga katalagman sama sa bagyo ug linog pinaagi sa aktibong partisipasyon sa lokal nga mga opisyal.

Mga Dilikado sa Landslide

Nag-una sa gihagit sa MGB mao ang mayor sa syudad sa Sugbo diin adunay 19 ka mga barangay nga dilikado sa landslide.

Kini mao ang mga barangay Lusaran, Binaliw, Budla-an, Malubog, Buot-Taup, Busay, Sirao, Taptap, Tag-bao, Tabunan, Pung-ol Sibugay, Sudlon 1, Sudlon 2, Sinsin,Buhisan, Pamutan, Sapangdaku ug Adlawon.

Ang syudad sa Naga, Cebu may lima usab ka barangay nga mao ang Tagjaguimit, Alpaco, Balirong, Mayana ug Naalad; ang barangay Hingatmonan, Lamesa, Luca, Ginatilan, Cabasiangan, Matun-og, Cansomoroy, Gaas, Magsaysay, Cabagdalan ug Duwangan sa lungsod sa Balamban.

Samtang sa syudad sa Toledo mao ang mga barangay sa Tungkay, Pangamihan, Bagacay, Loay ug Don Adres Soriano; barangay Lamac sa Pinamungahan, sa Asturias mao ang Agbanga, Baye, Bairan, Kanluangan ug Sak-sak; Sa Catmon ang Amancion, Anapog, Bactas, Bongyas, Ambangkaya, Cabungaan, Can-ibuang, Duyan, Ginabucan, Panalipan, Tabili ug Tinabyonan.

Tanang mga bukirang barangay sa syudad sa Talisay City ug ang barangay Doldol; Purok 3 sa Dumanjug; ug barangay Cansalonoy sa Ronda.

Sa lalawigan sa Bohol nalakip ang mga mga areas nga naapektoahn sa linog niadtong nakalabay nga tuig ug gimando ang proactive evacuation sa Tagbilaran City, Baclayon, Corella, Cortes, Alburquerque, Panglao, Dauis, Loon, Calape, Catigbian, Balilihan, Batuan, Sagbayan ug Carmen.

Si Alburo nitug-an nga base sa ilang assessment nagpakita nga dilikado usab sa baha ang lima ka mga barangay sa syudad sa Sugbo nga gilangkuban sa Kasambagan, Kinasang-an, Labangon, Mabolo, Bonbon, ug ang downtown areas subay sa Guadalupe River; ug ang pito ka mga barangays sa Mandaue City nga naglangkob sa barangay Subangdaku, Mantuyong, Umapad, Opao, Alang-alang, Guizo, ug Pakna-an.