Mga Residente Sa Sitio Sun-ok, Lahug Gibahaan!

Liboan ka mga lumulopyo sa Sitio Sun-ok, Barangay Lahug ang gibahaan apan dili gumikan sa tubig o sa kusog nga pagbunok sa ulan kun dili pinaagi sa mga libreng serbisyo nga gitanyag sa kagamhanan sa dakbayan sa Sugbo nga gipangulohan ni Mayor Michael Lopez Rama.

Mibaha ang mga libreng serbisyo sa 22 ka Departamento sa Cebu City Hall sa naasoyng dapit karong adlawa Marso 7, 2016 Lunes sa buntag. Kini pinaagi sa programa sa Mayor nga gitawag ug ‘City Hall At Your Doorstep’ kon ‘Piyesta sa Pagpangalagad’.

Naglangkob sa mga mibahang mga serbisyo ang konsultasyon sa rehistro sa pagkatawo, pagpakasal, ug pagkamatay, lakip usab ang pagtabang sa mikuha ug NSO birth certificate; mass feeding ug timbang sa mga kabataan; medikal nga konsultasyon; pagpang-limpyo sa mga kanal ug drainage; pagpanaod ug pagpang-ayo sa mga street lights; pagrehistro, kapon ug bakuna sa mga iro ug iring; ug pagtanyag ug laboratory services sama sa blood typing ug blood sugar testing.

Lakip usab sa mga mibahang serbisyo ang pagpanghatag ug mga seedlings nga itanumay nga mga herbal, prutas ug utanon; paghatag ug nagkadaiyang mga tambal ug bitamina; ug libreng seminar sa epekto sa pagamit ug ginadiling druga, trapiko, kalikopan, mga kalihokan ug kalambuan sa dakbayan, ug uban pa.

Alang kang Lola Carmen Sensentic, 68 ang edad, usa lamang sa mga natabangan sa kalihokan, mipaambit kini nga, “Okay kaayo ang gihimo ni Mayor Rama kay naglantaw siya sa mga pobre, dako kaayo ni ug tabang labi na nga naa na gyod dinhi mismo sa among dapit ang mga libreng serbisyo.”

Gipadayag usab ni Firma Valdez, 54 anyos nga angayan nga ipadayon ang programa kay dako gyod kini ug ikatabang sa mga katawhan hilabina na ang walay ikagasto ug plete ug pagpakonsulta sa pribadong doctor ug hospital.

Mokabat ug Php20 ang plete gikan sa Sityo Sun-ok paingon sa National Highway pinaagi sa Habal-Habal nga motor.

Atol sa kalihokan mitambong usab ang consultant sa mayor sa public services ug barangay affairs nga si kanhi konsehal Edwin Jagmoc aron sa pagduyog sa mapuslanong kalihokan nga naghatod ug serbisyo nga lang sa tanan ug paghatag ur rasyonale sa programa.

Karong semanaha ipahigayon ka-usa sa usa ka-adlaw ang programa. Ugma Marso 8 ipahigayon kini sa Sitio Sindulan, Barangay Mabolo; Marso 9 sa Barangay Talamban Gym; Marso 10 sa Barangay Pasil Gym; ug Marso 11 sa Barangay Sawang Calero Gym. (Cebu City Public Information Office PIO/Greggy Jiggs P. Senados)