Mga Residente Sa Barangay Day-As Natabangan

Subling gibisita sa mga kawani sa 22 ka departamento sa kagamhanan ning dakbayan ang mga lumulopyo sa Barangay Day-as, usa sa 80 ka barangays ning syudad aron sa paghatod ug mga libreng serbisyo karong adlawa Marso 4, 2016 adlawng Biyernes pinaagi sa ”City Hall At Your Doorstep” kon “Piyesta sa Pagpangalagad”.

Si Lola Locresia Fernandez, 67 ang edad nagpakonsulta sa doktor mipa-ambit nga, “Salamat kaayo ni Mayor Rama nga naglantaw siya sa kaayohan sa mga katawhan labi na sa mga kabus ug adunay libreng mga serbisyo nga niabot sa among barangay.”

Sa pakighinabi sa BARUGG News dugang gipasabot ni Lola Locresia nga dako kaayo ug tabang ang programa hilabina sa mga walay ikagasto sa pagpacheck-up sa hospital ug nanghinaot kining ipadayon ang programa aron mas daghan pang matabangan.

Samtang ang programa inisyatiba ni Cebu City Mayor Michael Lopez Rama diin ang 22 ka mga departamento ning dakbayan maghatod sa mga libreng serbisyo ngadto paduol sa mga katawhan ngadto usab sa ilang tagsa-tagsa ka mga barangay aron dili na sila mahasol, mahago ug makagasto pa pag-adto sa City Hall.

Naglangkob sa mga libreng serbisyo mao ang konsultasyon sa rehistro sa pagkatawo, pagpakasal, ug pagkamatay; mass feeding ug timbang sa mga kabataan; medikal nga konsultasyon; pag-ibot sa ngipon; pagpanglimpyo sa mga kanal ug drainage; pagpanaod ug pagpang-ayo sa mga street lights; ug pagrehistro, kapon ug bakuna sa mga iro ug iring.

Gitanyag usab ang laboratory services sama sa blood typing ug blood sugar testing; pagpanghatag ug mga seedlings nga itanumay sama sa prutas ug utanon; paghatag ug nagkadaiyang mga tambal ug bitamina; ug libreng seminar sa epekto sa pagamit ug ginadiling druga, paglikay sa sunog, mga kalihokan ug kalambuan sa dakbayan, ug uban pa.

Bisan ug wala mipakita ang Kapitan hugot usab ang suporta sa mga kawani ug ubang 6 ka mga opisyales sa Barangay Day-as sa naasoy nga kalihokan nga gipangulohan ni Konsehal Edgar Flores kinsa mipasalamat kang Mayor Rama sa paghimo sa programa ug sa tanang kawani sa dakbayan nga mihatag sa ilang kinasing-kasing nga pagpangalagad.

Ang maong barangay adunay 546 ka mga Pamilya o 4,132 ka mga lumulopyo nga nagpuyo sa 7 ka mga Sityo niini. Nahimutang kini sa Amihanang Distrito ning syudad ug 2 ka kilometro ang gilay-on gikan sa Cebu City Hall.

Ang kalihokan gisugdan ug usa ka Santos nga Misa nga gipangulohan ni Father Roger Piloton gikan sa Pope John XXIII Seminary. Atol sa iyang wali gihimug-atan niini nga gawas sa pag-atiman sa atong Pisikal nga mga panginahanglan labaw na usab nga atimanon ang Ispiritwal nga aspeto.

Malampusong nahuman ang kalihokan sa alas 12 sa odto hangtod na nga naserbisyohan ang tanan nga mitambong niini. (Cebu City Public Information Office PIO/Greggy Jiggs P. Senados)