Mga Police Station sa Cebu City Planong Butangan ug Animal Welfare Desk

Giplanohan karon sa Division of Veterinary Medicine and Fisheries (DVMF) ang pagtukod ug “animal welfare desk” sa tanang police station sa dakbayan sa Sugbo.

Sumala pa ni Dr. Jessica Maribojoc, ang acting veterinarian sa dakbayan sa Sugbo nga ang maong plano maoy magpalig-on sa inisyatiba ug programa alang sa kaayohan sa mga mananap.

Nagkanayon si Maribojoc nga maayo sab nga maghimo ug kumitiba alang sa animal welfare ang Cebu City Council aron mas matutokan pa ang proteksyon sa mga mananap sa dakbayan.

Pinaagi niining programa, mamahimo ng maka file ug reklamo ang mga reklamante ngadto sa nagkadaiyang nga police station may labot sa animal abuse.

Sa laing bahin, karong Hulyo 17 usab ipahigayon sa DVMF ang libreng veterinary services sama sa deworming, anti-rabies vaccination, vitamin supplementation ug uban pa. Diha ipahigayon ang maong kalihukan sa Plaza Sugbo.

Ang maong kalihukan may labot usab sa pag selebrar sa “Asong Pinoy Day 2022” diin hatagan sab ug pagtagad ang mga local breed sa mga iro partikular na ang Aspin. Gi awhag usab ni Maribojoc ang mga indibidwal nga nanag-iya ug Aspin nga mutambong ining maong kalihukan aron matagaan ug libreng bakuna ug uban pang serbisyo ang ilang mga iro.

Samtang, ang Island Rescue Organization (IRO), magbutang sab ug “help desk” sa venue alang sa pagtubag sa nagkadaiyang mga pangutana sa mga buot mutambong. Mamahimo sab nga maka file ug reklamo ang mga tawo may labot sa animal abuse.

90% sa adbokasiya sa IRO mao ang paghatag ug labing pagtagad sa mga iro nga biktima sa hit-and-run.

Si Annalyn Aizpuran, ang Presidente sa IRO mibutyag nga plano nilang butangan ug sticker ang mga sakyanan nga magpahinumdum niini nga angay tamakan ang brake aron dili maligsan ang mga iro ug uban pang mananap.