Mga Pilipinong Mangingisda, Gawasnong Maka-pangisda sa Panatag Shoal – Palasyo

(PIA-7) — Gitataw sa Palasyo nga gawasnong maka-pangisda ang mga Pilipino sa kadagatan sa West Philippine Sea ug dili na kinahanglan pang magpahibalo sa gobyerno sa China.

Matud pa ni Deputy Presidential Spokesperson Abigail Valte, nahimong agresibo lamang ang China sa ilang pag-angkon sa Panatag Shoal apan nagpabilin pa gihapon kining teritoryo sa Pilipinas.

Giingong dili na usab kinahanglang magpahibalo ni bisan kinsa aron ipadayon ang ilang panginabuhian.

“Our fishermen do not need permission to fish in our waters. As Atty. Perez said, mayroon lang po tayong mga designated areas, pero in general, wala po silang kailangan na mga permiso mula sa atin dahil atin naman po ‘yon e” (Ang atong mga mangingisda wala na nanginahanglan og pagtugot sa pagpangisda sa atong dagat. Sa giingon na ni Atty. Perez, aduna lang kita’y gi-designar nga lugar, apan sa kinatibuk-an, wala sila’y kinahanglan nga permiso gikan sa atoa tungod kay atoa man kana), matud pa ni Valte.

Una nang gitambagan ni Bureau of Fisheries and Aquatic Resources (BFAR) Director Asis Perez ang mga mangingisda nga likayan ang mga gitawag nga ‘dangerous areas’ samtang gihulat ang desisyon sa International Tribunal on the Law of the Sea.

Kahinumdoman nga gi-bombahan og water cannon sa Chinese Coast Guard ang pipila ka Pilipinong mangingisda sa Panatag Shoal ning bag-o lang. (mbcn/ecb/PIA7-Bohol)