Mga Mobabag sa ‘Clearing Operation’ sa brgy Ermita, Kasohan ni Rama

Gimando ni Mayor Michael Rama ngadto sa iyang mga sakop nga pugson pagpapahawa ang mga tawo nga magbabag sa agianan paingon sa Sitio Bato, Ermita aron dili sila makapalangay sa clearing operation sa maong dapit.

Matud ni Rama nga dili lang hinoon siya magpakita didto sa maong dapit kay nalantawan niya nga kon iya kining himoon himoan na usab kini og maniobra sa iyang mga kaatbang sa politika aron mabutang siya sa kontrobersyal.

Si Raquel Arce nga maoy gitugyanan ni Mayor Rama sa pagpahigayon og clearing operation sa nasunog nga bahin sa Sitio Bato mi-report nga adunay mga tawo nga nagbabag aron nga dili makasulod sa nasunogan ang mga sakop sa clearing team.

Gitataw ni Rama nga wala mausab ang iyang baruganan nga kadtong mga tawo nga magsamok-samok sa kalihukan sa City Hall angay’ng pasakaan og kaso.

Kini usab maoy buot mahitabo ni Arce aron nga mahadlok na ang mga tawo nga motinguha nga babagan ang clearing operation ingon man reblocking sa Sitio Bato nga nasunog kaniadtong Abril 20.

Ang mga technical personnel sa City Hall kagahapon mipresentar na og mga plano kabahin sa reblocking sa Sitio Bato apan gipatun-an pa kini pag-ayo ni City Administrator Jose Marie Poblete.

Si Poblete nagkanayon nga basi sa sugyot sa mga technical personnel nga ang matag lote nga itugyan sa mga pamilya nga nabiktima sa sunog adunay 16 metros ang gidak-on.

Matud ni Poblete nga ang maong gidak-on igo na kaayo kapuy-an sa matag pamilya. Si Arce namahayag nga hinay kaayo ang ilang pagpahigayon sa clearing operation kay dunay mga tawo nga wala mopahawa sa dapit nga nasunogan.

Si Alvin Santillana sa City Disaster Risk Reduction and Management miingon nga basi sa balaud makiha kadtong mga tawo nga mobabag sa proyekto sa kagamhanan nga gitumong aron malikayan ang katalagman.