Mga Katigulangan Sa Dakbayan Sa Sugbo Nakadawat Ug Ayuda

Mayorya sa 61,169 ka mga kwalipikadong Senior Citizens sa 80 ka barangays ning syudad ang nakadawat na gyod ug tag Dos Mil pesos matag-usa isip unang hut-ong sa tag 12 Mil matag tuig nga pinansyal nga ayuda gikan sa kagamhanan ning dakbayan karong adlawa Pebrero 12, 2016 Biyernes.

Sa pakighinabi sa BARUGG News, gibutyag ni Domingo Chavez Jr., hepe sa Office of the Senior Citizen’s Affairs kon OSCA nga hapsay ug malinawon ang pagpahigayon sa distribusyon ug aduna lamay pipila ka mga problema sama sa sayop ang spelling sa pangalan sa identification card kon ID ug sa payroll, ug mga ID nga wala pa ma-validate.

Gipasabot usab niini nga ang adunay problema giawhag sa pagbisita sa buhatan sa OSCA sa First Floor sa Executive Building sa Cebu City Hall.

Giawhag usab ni sa hepe sa OSCA ang iyang mga kaubanang mga katigulangan nga magpamiyembro sa Senior Citizen’s Organization sa ilang tagsa-tagsa ka mga barangay aron ma-aktibo sila sa mga kalihokan.

Mapasalamaton si Lola Nenita Sumampong, 72 anyos ngadto sa kagamhanan ning dakbayan hilabina kang Mayor Michael Rama.

Giasoy niini nga, “Dako among pasalamat ni Mayor Rama kay naglantaw siya sa kaayohan sa mga Senior Citizens dako ni ug tabang namo pareha nako naa nakoy ibayad sa tubig ug kuryente ug palit ug pagkaon.”

Tinguha ni Cebu City Mayor Michael Lopez Rama nga dili na mahasol, mahago, maghuot, ug makaplete pa pag-adto sa buhatan sa OSCA ang mga katigulangan maong didto mismo sa mga kabarangayn gipahigayon ang distribusyon.

Gipangulohan sa mga kawani sa mga nagkadaiyang buhatan sa Cebu City Government, uban sa mga sakop sa Cebu City Police Office ug uban pang mga opisyales ug kawani sa mga kabarangayan ang kalampusan sa pagpang-apod-apod sa naasoy nga ayuda.

Gihatagan ug dakong importansya ni Mayor Rama ang mga katigulangan gumikan kay sila ang tamdanan sa mga sumusunod nga henerasyon. Giila sa Mayor ang ilang dakong natampo nga kalambuan sa dakbayan niadtong lig-on pa ang ilang mga kalawasan. Kini alang usab paghatag ug ayuda labi na sa mga kabus nga katigulangan ug aron usab sila makapadayon sa ilang katilingbanong kaakuhan. (Cebu City Public Information Office PIO/Greggy Jiggs P. Senados)