Mga Kapitan sa Dakbayan, Seminaron

Ang tanang mga kapitan sa barangay dinhi sa dakbayan sa Sugbo giawhag nga motambong og duha ka adlaw nga seminar nga ipahigayun unya sa Pebrero 7 ug 8 sa sunod tuig kabahin sa tukma nga pamaagi sa pagdumala sa ilang barangay.

Matud ni Vice Mayor Edgardo Labella, maglakip sa mga speakers ug lecturers sa mao nga seminar mga opisyal sa Philippine Institute of Certified Public Accountants (PICPA) nga modiskutir sa fiscal management kon pagdumala sa panalapi sa barangay.

Ang kalihukan anha ipahigayon sa ika-upat nga andana sa City Legislative Building nga mao ang social hall sa dakbayan sa Sugbo.

Giawhag ni Labella ang mga kapitan nga iuban sa seminar ang ilang konsehal nga nagdumala sa Committee on Budget and Finance, treasurer ug ingon man ang bookeeper sa barangay.

Matud ni Labella nga ang nakaaghat kaniya sa pagpahigayon niining mao nga seminar mao ang sugyot sa mga tinun-an sa Accountancy nga naghimo og thesis kabahin sa barangay fiscal management.

Ang mga Accountancy students misugyot nga angay’ng aduna g’yuy makanunayon nga seminar nga ipahigayon aron magtudlo sa mga opisyal sa barangay kabahin sa pagdumala sa ilang salapi sa tumong nga dili sila makahimo’g kalapasan sa mga lagda sa State Audit Procedures.