Mga Binilanggo sa Syudad Dalhon na sa Bilibid

Katorse ka “insular prisoners” sa Cebu City Jail ang ipadala sa Manila ugmang adlawa (Miyerkoles), ang 12 kanila adto dad-on sa New Bilibid Prisons samtang ang duha adto sa tambalanan sa mga nalisoan sa maayong pangisip.

Si City Jail Warden Johnson Calub miingon nga ang Cebu City Jail adunay 107 ka “insular prisoners” apan dili nila mapadala ang tanan kanila kay nagkuwang sila og kwarta nga alang sa ilang plete sa barko.

Ang balaud naglatid nga ang “insular prisoners” kon kadtong mga binilanggo nga nahukmang sad-an sa ilang kaso og ang silot subra sa tulo ka tuig og usa ka adlaw kinahanglang dad-on gayud sila sa nasudnong bilanggoan.

Sagad nga himoon mao nga ang mga binilanggo gikan sa lainlaing bilanggoan nga gidumala sa Bureau of Jail Management and Penology (BJMP) ug sa mga provincial jail adto gayud una nga dad-on sa New Bilibid Prisons.

Kon ang mao nga mga binilanggo magpakita og kabuotan sa New Bilibid Prisons sa Muntinlupa, balhinon na sila sa lainlaing nasudnong bilanggoan sama sa Iwahig Penal Colony sa Palawan, Davao Penal Colony ug uban pa.

Sa mga national penetentiary, ang mga piniriso tugotan nga makatikad og uma samtang magpadayon sa ilang pagserbisyo sa ilang sentensya apan ang ilang halin sa produkto tipigan sa nagdumala sa bilanggoan ug ihatag lang sa ila na nga paggawas.