Mga Bakwit Patudloan og Livelohood Projects

Giawhag ni Cebu City Vice Mayor Edgardo Labella ang kadagkoan sa lainlaing ahensya sa kagamhanan nga tudloan og mga livelihood ang mga bakwit nga taga Tacloban City nga ania karon sa dakbayan sa Sugbo.

Tumong ni Labella nga kon mahibalik na didto sa Tacloban ang maong mga bakwit, aduna sila’y makat-onan sa pag-estar nila dinhi sa Sugbo kay sa mausik lang ang ilang oras sa pagsigi’g higda diha sa lainlaing evacuation centers.

Ang bise mayor miawhag sa kadagkoan sa Department of Social Welfare and Development (DSWD), Technical Education Skills Development Authority (TESDA) ug ang mga opisyal sa kabarangayan nga magtinabangay alang sa pagtudlo og livelihood projects sa mga bakwit.

Si Barangay Kapitan Joel Garganera sa Brgy. Tinago miingon nga daghan sa kapin sa 100 ka bakwit nga anaa karon sa ilang sports complex ang adunay mga abilidad nga sarang kapahimuslan sa katawhan ug bugti niini ang mga hingtungdang bakwit makakwarta.

Ang problema hinoon sa mga bakwit nga maantigo unta mamanday mao nga wala sila’y kahimanan nga magamit.

Si Labella miingon nga tinguha niya nga katabangan gayud ang maong mga bakwit mao nga giawhag niya kadtong mga nangita og trabahador nga adto mokuha sa mga bakwit agi’g pagtabang kanila nga makakwarta.

(Image Credit: www.fo6.dswd.gov.ph)