Mga Bakwit Gikan Tacloban,Wala pay Kapuy-an

Mga 300 ka pamilya kang kansang kabalayan gikupog sa bagyo’ng Yolanda didto sa Tacloban City, Leyte ang namakwit dinhi sa dakbayan sa Sugbo kay dili na ganahan pa nga mopuyo sa maong dapit.

Si Mayor Michael Rama gihangyo ni DSWD Regional Director Mercedes Jabagat nga pangitaan og dapit dinhi sa dakbayan ang maong mga bakwit nga temporaryo nila nga kapuy-an.

Gisugyot ni director Jabagat nga papuy-an sa maong mga pamilya ang Cebu City Sports Center (CCSC) apan ang mayor miingon nga dili mahimong gamiton ang sports center tungod sa mga nakahan-ay na nga mga sports activities nga anha ipahigayon.

Gipasusi ni Rama ang sports complex sa Barangay Tinago ug sa uban pa nga mga barangay nga posible nga magamit isip temporaryo nga kapuy-an sa mga bakwit nga pamilya.

Matud sa mayor nga ang kagamhanan sa dakbayan sa Lapu-lapu ug kanait nga mga dakbayan dinhi sa Sugbo angay usab nga motabang sa maong mga bakwit ug dili ra kay ang siyudad.

Kabahin sa pagkaon sa maong mga bakwit kon dia pa sila sa Sugbo, matud ni Rama, nga ang DSWD maoy angay’ng motagad sa mao nga problema kay usa sila ka ahensya sa nasudnong kagamhanan.

Ang maong mga pamilya misakay paingon dinhi sa Sugbo sa mga C-130 Plane sa Philippine Air Force nga naghatud og mga relief goods ug pagkaon didto sa Tacloban.