Mga Agawon Gipasidad-an sa Paghatag og Tukmang Sweldo

Gipasidan-an ni Mayor Michael Rama ang mga agawon nga wala mohatag og tukma nga sweldo sa ilang mga kawani nga basin og masinati nila ang “karma” tungod sa ilang pag-abuso sa mga mamumuo.

Matud sa mayor nga angay’ng moluwat sa ilang katungdanan kadtong mga opisyal sa Department of Labor and Employment (DOLE) nga wala makatuman sa ilang tahas pagpugos nga ang mga mapahimuslanon nga agawon mohatag og tukma nga sweldo sa ilang kawani.

Dinhi sa Sugbo ug ubang highly-urbanized city, gimando sa Regional Tripartite Wages and Productivity Board (RTWPB) nga P385 na ang minimum nga sweldo sa mga mamumuo apan nasayran nga daghang agawon ang wala motuman niini.

Si Rama miingon nga angay’ng huna-hunaon sa mga agawon nga kun sila nakaganansya sa ilang patigayon, angay sila nga mohatag og bugti sa ilang mga trabahador pinaagi sa paghatag og husto nga sweldo.

“Karma does not come for today. Remember there is such a thing as generational ailment,” matud sa mayor.

Base sa pagpanuki-duki sa MetroCebuNews nasayran nga daghan’g kawani sa mga tindahan dinhi sa downtown area ang nagdawat lamang og tag P200 ang sweldo mata’g adlaw ug dili sila libre sa pagkaon. Ang mao nga sweldo ubos kaayo sa minimum wage.

“Agwanta ra mi sir kay kum motug-an mi sigurado nga wala na mi trabaho inigka-ugma,” matud sa tindera sa baligyaanan og mga panapton sa dalan Manalili.

Ang mga tinugyanan sa DOLE gihulagway nga dili sinsero sa pagsuhid sa mga tindahan aron pagsuta kinsa ang mga kawani nga wala hatagi og tukma nga sweldo.

Ang paagi sa uban nga agawon mao ang pagpapirma og duha ka matang sa payroll sa ilang mga kawani, ang usa nagpakita nga sila gihatagan gayud sa husto nga kantidad basi sa minimum wage.

Matud ni Rama nga angayan nga hinuktokan sa mga agawon kun husto ba ang ilang gihimo.