MCIAA Tuyo Nga Mahimong “Asia’s Most Friendly Passenger” Airport

Tuyo karon sa Mactan Cebu International Airport Authority (MCIAA) nga mamahimong Asia’s most friendly passenger airport.

Sumala pa ni Julius Neri Jr., ang General Manager ug Chief Executive Officer sa MCIAA nga ilang gipaningkamotan nga mamahimo silang the best dili lamang sa Pilipinas, apan sa tibuok Asya. Gipangayo sab ni Neri ang kooperasyon ug pakigtambayayong sa tanang stakeholders.

Nahitabo ang paghatag ug mensahe ni Neri sa publiko atol sa ilang ika-32 nga anibersaryo nga diha gipahigayon sa Waterfront Hotel and Casino sa Barangay Lahug, dakbayan sa Sugbo kagahapong adlawa.

Dugang pa ni Neri nga ang maong kalihukan ug pag anunsyo maoy nagpakita sa ilang tumong sa pagsuporta nga andam ug abli ang Sugbo sa tanang matang sa commerce ug turismo.

Gibutyag sab ni Neri nga sa iyang opinyon, ang MCIA maoy the best airport in the Philippines. Nasayran nga ang MCIA nakadawat na ug pipila ka mga pasidungog dili lamang sa lokal apan lakip na sa internasyonal.

Gihinumdum sab ni Neri ang mga pagsuway ug sugilanon sa MCIA, lakip na ang mga staff niini kaniadtong panahon sa COVID-19 Pandemic lockdown dihang mihunong ang operasyon sa mga tugpahanan dili lamang sa Pilipinas apan lukop kalibutan.

Apan taliwa sa mga pagsuway nga ilang nasinati, nangita ug pamaagi ang MCIA nga mamahimong mas andam ug progresibo sa panahong maablihan na pagbalik ang turismo.

Ang ika-32 nga selebrasyon sa anibersaryo sa MCIA maoy nahimo sab nga kahigayonan aron ipakita ang ilang bag-ong logo ug ipakita ang ilang bag-o sab nga music video.

Samtang isip bag-ong sekretarya sa Department of Tourism, gipakita ni Sec. Christina Garcia Frasco ang iyang suporta sa mga lakang ug kalampusan nga nahimo sa MCIA.

Nagtuo si Frasco nga taas pa ang kalamboan nga maabot sa MCIA.