Mas Limpyo nga Petrolyo, Gamiton Sugod Hulyo – DENR

(PIA) — Gipaabot nga makuhaan ang polusyon sa nasud human mipagawas ang Department of Environment and Natural Resources (DENR) og direktiba sa paggamit sa mas limpyong petrolyo nga sugdan sa Hulyo ning tuig.

Sa DENR Administrative Order No. 2015-14 nga gi-isyu ni Environment Secretary Ramon Paje, mas hugtan na ang emission standards alang sa carbon monoxide (CO), hydrocarbon, oxides sa nitrogen ug particulate matter.

Gibutyag ni Paje nga base sa bag-ong emission requirement, angay mosunod ang mga motorista sa Euro 4 fuel standards isip hulip sa kasamtangang gigamit nga Euro 2.

Base sa Euro 4 standards, ang emission sa sulfur content sa diesel ug gasoline angay may sukod lamang nga 50 parts per million sa kanhi 500 ppm sa Euro 2.

Ang Benzene sa gosolina angay usab nga 1% sa volume kun itandi sa 5% sa Euro 2 fuel.

Alang usab sa aromatics, Euro 4 fuel angay may sulod nga 35% sa volume.

Giingong tuyo niining malikayan ang polusyon ug ang epekto niini.

Matud pa ni Paje, mahimong gamiton ang Euro 4 fuel bisan sa mga daan nga sakyanan.

“The planned shift to Euro 4 was made possible through the support of oil players, car manufacturers and transport groups, who are doing their fair share to curb air pollution and reduce its impact,” matud pa ni Paje. (mbcn/ecb/PIA7-Bohol)