Manipis Road Pasirad-an sa DENR-7

Giawhag sa Department of Environment and Natural Resources (DENR)7 ang Department of Public Works and Highways (DPWH) nga pasirad-an ang Manipis road sa syudad sa Talisay sa higayon nga mobunok ang kusog nga ulan.

Kini aron malikayan ang disgrasya sa mga motorista nga malagmit madahilian sa yuta sa pipila ka bahin sa maong barangay.

Matud pa ni DENR-7 Regional Director Isabelo Montejo nga dili luwas nga agian ang karsada sa Manipis sa panahon sa ting-ulan base sa nasaksihan sa tanan nga pagdahili sa dagkong mga bato diin duha ka mga balay ang nasabak niini ug naguba sa miaging adlaw.

Sigon sa pakisusi sa Mines and Geo-Sciences Bureau (MGB-7) nagpadayon ang pagdahili sa yuta sa maong barangay tungod sa paghumok sa yuta tungod sa kusog nga ulan.

Kini usab ang hinungdan nga gipabakwit sa MGB-7 ang 9 ka pamilya gikan sa maong lugar aron malikay sa peligro.

Dugang pa ni director Montejo nga angayan usab nga pasirad-an ang maong dalan sa panahon sa tinguwan aron walay mga motorista nga makaagi ug walay madisgrasya kun may landslide.

Image Credit: panoramio.com