Mando sa DepEd Direktor, Gisaway

Gisaway si Regional Director Carmelita Dulangon sa Department of Education (DepEd) sa Central Visayas sa mando niini nga ipaputol ang mga karaang kahoy sulod sa school campus sa tibuok rehiyon 7.

Kini tungod kay nakalapas kuno kini sa DepEd Order No. 33 Series of 2008 nga giluwatan ni kanhi Education Secretary Jesli Lapus.

Matud pa sa usa ka opisyal sa DepEd nga wala magpaila, nga gibatbat kuno sa maong balaod nga tanang public ug private schools sa tibuok nasud angay mananum og kahoy sama sa Narra, Molave, Acacia ug Kamagong aron mabatokan ang epekto sa global warming.

Gidugangan pa ang maong mando sa kanhi kalihim sa DepEd nga angay palapdan ang pagpananom og kahoy, ingon man ang pagpatubo niini ug pag-atiman sulod sa mga kampus sa eskuylahan ug kasikbit nga mga lugar sulod sa komunidad.

Uban usab sa maong mando, higpit nga gidili niini ang pagpamutol sa maong mga kahoy ug pasagdan kining matumba, maluka ug mangabali ang sanga basta atimanon lang kini pag-ayo.

Apan hinuon wala usab imando kun unsay buhaton niining mga kahoya sa higayong inigkabali sa sanga niini may mga estudyanteng matumbahan.

Sayo niini, gimandoan ni Dulangon ang mga principal sa mga tulunghaan sa paglukat og permiso gikan sa Department of Environment and Natural Resources (DENR) 7 aron puohon na ang mga kaaraang kahoy kay matud pa naghatag kini og hulga sa kinabuhi sa mga bata nga nag-ekuyla.