Mandaue Motampo Og P70 Milyones Alang sa CICC

Mopagwas og P70 milyones ang kagamhanan sa dakbayan sa Mandaue agi og tugbang sa gigahin sa kagamhanan sa lalawigan alang sa pagpaayo sa Cebu International Convention Center (CICC) nga nahimutang sa dakbayan sa Mandaue.

Kini ang gipadayag ni Mayor Jonas Cortes sa mga tigbalita nga nakiginabi kaniya human sa tigom nga gihimo sa mga sakop sa CICC board. Matud pa niya nga base sa pasiunang pakisusi sa mga engineer nga mogasto ang kadaot og P160 milyones kapin.Dugang pa niya nga nag-umol na ang CICC board og mga sakop sa technical worksing group alang sa hingpit nga pagpaayo sa edipisyo sa lalawigan.

Gitataw niya nga lakip kasron sa ilang gitan-aw mao ang pagpakiglambigit sa pribadong mga investor alang sa private partnership ug amg pagkuha pa og dugang gahin sa nasudnong kagamhanan.

Sa nasayran nakasinati og mga kadaut ang CICC dihang gitay-og kini sa 7.2 magnitude nga linog niadtong Oktobre 15 sa miaging tuig. Gisundan kini sa dugang pang kadaut sa bagyong Yolanda niadtong Nobyembre 8 sa mao gihapong tuig.

Ang pagpaayo sa CICC maoy kabahin sa pagpangandam sa gitakdang duha ka dagkong kalihokan sa sunod tuig dinhi sa Sugbo nga naglakip sa APEC ug Eucharistic Congress.