‘Malaw-ayng Basahon, DVDs Gisakmit

● CAIB mibahad sa mga tigbaligya og ‘X-rated’ DVDs ug mga magazines nga moundang na sa pagpamaligya niini.

Daghang hilas nga basahon ug malaw-ay nga salida nga gibaligya pinaagi sa Digital Video Disc (DVD) ang gisakmit sa mga sakop sa Cebu City Anti-Indecency Board (CAIB) nga gipangulohan ni City Administrator Lucelle Mercado.

Ang kapin sa 300 ka lainlaing magazines nga nagmantala og law-ay nga talan-awon sama sa hulagway sa mga hubo nga
kababayen-an nasakmit gikan sa usa ka balay-patigayon nga nahimutang sa higante’ng mall sa North Reclamation Area (NRA).

Matud ni Mercado nga ang permitee sa stall nga gisakmitan nila og 387 ka lainlaing magazine mibayad na og multa nga P5 mil tungod sa paglapas nila sa ordinansa sa dakbayan nga nagdili pagbaligya og mga malaw-ay nga basahon.

Nahibaw-an usab nga adunay susama nga stall nga nasakmitan usab og malaw-ay nga basahon kaniadto’ng 2012 mao nga gibaharan ni Mercado ang permitee nga kun masakpan kini pag-usab pasirad-an na g’yud ang ilang tindahan.

Gibutyag ni Mercado nga walay miangkon nga tag-iya sa 391 ka lainlaing matang sa DVD nga ilang nasakmit gikan sa mga stall sa silong nga bahin sa karaang sinehan sa Vision diha sa dalan Colon.

Matud ni Mercado nga gipangbiyaan sa mga nagbantay ang ilang mga baligya diha nga miabot ang mga sakop sa CAIB.

Gibaharan ni Mercado ang mga tigbaligya og mga DVD ug mga magazines nga moundang na pagpamaligya og hilas nga basahon ug mga law-ay nga salida kay tinud-on gayud sila sa CAIB.

Ang multa hinoon sa makalapas sa anti-indencency ordinance dili mosubra sa P5 mil apan ang City Hall mahimo nga makapasirado sa tindahan pinaagi sa pagrebokar sa permit.