Malakanyang, Gipahinumdoman ang Ombudsman sa Immunity sa Presidente

Subling gipahinumdoman sa Malakanyang ang Office of the Ombudsman nga dili mahimong kasohan si Presidente Rodrigo Duterte.

Pahayag kini ni Presidential Communications Office (PCO) Kalihim Martin Andanar human miingon si Ombudsman Conchita Carpio Morales nga ilang ipadayon ang pagpahigayon og imbestigasyon batok ni Presidente Duterte taliwala sa pagbaton niini og ‘immunity from suit’.

Gitumbok ni Andanar nga gi-ila sa Palasyo ang mandato sa Ombudsman nga aksyunan ang mga reklamo batok sa kawani ug opisyal sa gobyerno. Apan matud pa, giingong “entirely different matter” ang kaso batok sa Presidente.

Niadtong Biyernes sa niaging semana, gikompirmar sa Office of the Ombudsman nga may lakang na silang gihimo kalabot sa plunder complaint nga giduso ni Senador Antonio Trillanes IV batok kang Presidente Duterte tungod sa giingong pag-hire og ghost employees sa dihang mayor pa kini sa lungsod sa Davao.

Gawas sa maong reklamo, gihisgotan usab ni Morales nga wala usab nila gipadaplin ang posibilidad nga ma-imbestigahan usab ang Presidente kalabot sa mga kaso sa extrajudicial killings sa nasod. Giingong mahimong imbestigahan sa Ombudsman kun adunay ‘misconduct’ sa parte sa usa ka opisyal sa gobyerno. (ecb/PIA7-Bohol)