‘Makililimos sa Dakbayan Midaghan’

Ang kadagkoan sa Cebu City Anti-Mendicancy Office mihatag og rason ngano nga wala kaayo sila’y nahimo pagsanta sa pagdagsa sa mga makililimos dinhi sa dakbayan.

Ang ilang rason mao nga wala kuno sila’y mga sakyanan nga magamit aron pasakyan sa mga tawo, apil ang mga bata’ng libud-suroy nga ilang ma-rescue gikan sa kadalanan nga nagpakilimos.

Matud ni Isabelita Ganub, executive officer sa City Anti-Mendicancy Office, nga pagka karon usa ra g’yud ang sakyanan sa ilang opisina nga magamit kun mohimo sila og operasyon batok sa mga makililimos.

Si Ganub miingon nga ang dakbayan adunay bag-ong programa ug ang City Anti-Mendicancy Office maoy gitahasan pagpatuman sa gitawag og transformation of street dwellers and street children.

Si Ganub miingon nga nagkinahanglan sila og duha ka sakyanan aron hingpit nga mapatuman ang programa ug kini gamiton sa rescue teams nga idistino sa North ug South districts.

Ang gisugyot nga sakyanan nga paliton mao ang Mitsubishi L300 nga nagkantidad og P900 mil ang matag usa. Si Mayor Michael Rama miaprobar na sa pagpalit sa maong mga sakyanan.

Si Konsehal Gerardo Carillo miduso na og resolusyon didto sa City Council apan wala dayon aprobahi sa mga konsehal ang hangyo kay himoan pa og dugang pakisusi.