Mag-uuma sa Toledo Giabagan sa DA

Gikalipay sa mga mag-uuma og humay sa dakbayan sa Toledo, Cebu kay giabagan sila pagpamaligya sa ilang ani pinaagi sa Toledo City Agriculture Office (CAO).

Gibutyag kini ni Renelio Mabao, Toledo City Agriculturist, kinsa nagkanayon nga ang unang suki sa mga mag-uuma mao ra usab ang mga kawani sa kagamhanan sa Toledo.

Gani miingon si Mabao nga ang maong mga kawani maoy nagpadasig kaniya sa pag-awhag sa mga mag-uuma nga mamaligya sa ilang ani kay gusto silang motilaw sa kaugalkingong produkto sa kahumayan sa mga silingan niini sa Toledo.

Matud pa ni Mabao nga nagsugod kining maong pamatigayon niadtong Agusto niining tuiga diin gikalipay kaayo sa mga mag-uuma ang maong tabang sa Toledo City agriculture office.

Midugang si Mabao nga sukad niadto hangtud karon, nagpadayon na ang pagmerkado sa mga mag-uuma og humay sa ilang mga produkto ngadto sa mga kawani sa dakbayan.

Usa sa hinungdan nga nasuki na sila sa mga kawani mao ang prisyo nila matag sako nga P2,100 ra itandi sa tag-P2,500 matag sako sa tindahan.

Miingong si Mabao nga usa sa hinungdan nga mas ubos ang prisyo sa mga produktong humay gikan sa mga mag-uuma kay ang mga binhi nila nagagikan ra usab sa buhatan sa agrikultura sa Toledo.

Base sa rekord, ang mag-uuma mopalit sa ilang itanom nga binhi sa tag-P1,300 matag sako nga ilang ikatanom sulod sa duha-tulo ka ektaryang humayan.

Sa samang higayon, may barato usab nga abuno nga giandam ang kagamhanan alang sa mga mag-uuma nga maoy hinungdan nga nagpabilin kanunay ang barato nga prisyo sa ilang ani itandi sa mga baligya nga bugas humay sa tindahan, matud ni Mabao.