Mag-uuma Gitugotang Mobaligya og Taas nga Presyo sa Humay

Gibutyag sa National Food Authority (NFA)-7 nga makabaligya gihapon ang mga mag-uuma og taas ang presyo sa commercial rice sa kamerkadohan dinhi sa Sugbo ug sa Central Visayas bisan pa niining panahon sa ting-harvest.

Sumala sa tigpamaba nga si Ma. Lucia Rosales sa NFA-7 nga kun taas ang prisyo sa commercial rice sa merkado, dako ang posibilidad nga mahal usab ang palit sa negosyante og humay gikan sa mga mag-uuma mismo.

Kini sa tuyo nga mabawi sa mga mag-uuma ang gasto nila sa abuno ug kemikal nga gigamit nila sa pagpamomba sa tanom aron sa pagpatay sa nagkalainlaing dangan nga miatake sa ilang mga kahumayan.

Gitumbok hinuon ni Rosales nga ang makalolooy mao ang mga konsumedor kinsa magbaguod sa taas nga presyo sa bugas humay.

Nasayran nga ang NFA-7 daan na nga mitug-an nga dili sila makapugong sa pagsaka sa prisyo sa mga commercial rice apan iyang gitataw nga angayan nga pilion sa mga konsumedor ang NFA rice sanglit nagpabilin pa gihapon kini sa P 27 matag kilo.

Mipahimangno hinuon kini sa mamaligyaay og bugas nga langkatan sila og lisensya kun masakpan sila nga sambugan ang NFA rice ug commercial rice ug prisyohan og tag P51 matag kilo.

Kini usa ka tataw nga kalapasan sa reglamento sa NFA busa di lang kay lisensya ang sakmiton kundili mahimo pang mapriso ang magbuhat sa ingon ,sumala pa ni Rosales.

Image Credit: commons.wikimedia.org