Mag-uuma Gipasidan-an Bahin sa Huwaw

Mipahimangno ang National Irrigation Administration (NIA-7) ngadto sa mga mag-uuma nga angay pangandaman ang pag-uga sa yuta agi og epekto unya sa El Niño sugod sa sunod buwan.

Matud pa ni Engr. Norma Monisit sa NIA-7 nga dili kakompyansahan ang pag-igo unya sa umaabot nga huwaw karong tuiga tungod kay gipaabot nga grabi ang kainit nga masinati unya.

Midugang si Monisit nga ilang gikabalak-an nga manga-uga gayud ang yuta sa kaumahan, hilabi na sa nahimutang sa kabukiran nga layo kaayo sa tinubdan sa tubig ug irrigation canal.

Gawas niini, iya usab nga gipahibawo nga posibleng ang maong huwaw molanat pa og taas nga panahon hinungdan nga ilang giaghat ang mga mag-uuma nga magdaginot og tubig nga gamiton sa ilang mga tanum.

Gani iyang gipanghinaut nga dili kini moabot sa bulan sa Oktobre kay mas molapad pa unya ang kadaot sa mga kaumahan.

Gipahibawo usab ni Monisit nga dinhi sa Sugbo, bugtong ang Kan-asohan Dam lamang sa syudad sa Carcar ug Buhisan Dam sa syudad sa Sugbo maoy gisaligan karon nga tinubdan sa tubig.

Samtang ang Department of Agriculture (DA-7) pinaagi ni Dr. Fabio Enriquez hepe sa Operation Division, mipahimangno usab sa mga mag-uuma sa posibleng pagdagsa sa mga pesti sa mga tanom atol sa pag-igo sa huwaw karong sunod bulan.

Apan iyang gitataw nga ang ilang buhatan andam nga mohatag og ayuda alang sa mga panginahanglan sama sa chemicals alang sa pagsanta sa mokuyanap unya nga mga piste.