Maestro, Tinun-an, Nasudlan og Espirito

Usa ka maestro ug unom ka tinun-an sa pribado’ng tunghaan didto sa lungsod sa Argao gikataho nga nasudlan og dautang espiritu.

Ang mga nasudlan og espiritu maestro ug tinun-an sa Argao Center for Science and Learning Inc. sa Barangay Lamacan.

Nagkaguliyang ang mga ginikanan sa mga tinun-an sa pagkuha sa ilang mga anak sa kahadlok nga maapil kini nga masudlan sa dautang espiritu.

Si PO2 Renato Nacaytona sa Argao Police Station nagkanayon nga ang tunghaan nagpreparar unta sa ilang final examination diha’ng kalit nga nagkaguliyang ug nabalda ang klase.

Kini human adunay mga tinun-an ang mikalit lang pagsinggit nga daw nasudla’g demonyo nga pwerte’ng pagkaisoga ug siga na kaayo’g mga mata.

Sagad sa nasudla’g espiritu nagpangedaron og 14 ngadto sa 16.

Ang tag-iya sa tunghaan nga si Lea Chavez mipakanselar dayon sa klase buntag ug gipapauli ang mga tinun-an sa elementarya ug high school.

Nagkaguliyang ang tunghaan kay daghang mga bata ang nangahadlok ug mga ginikanan mikuha sa ilang anak kay mahadlok nga masudlan usab kini sa dautang espiritu.

Matud ni PO2 Nacaytona nga siya ug kaubang polis mitabang sa paggunit sa tiil sa usa ka estudyante’ng babaye nga nasudla’g espiritu nga pwerting kusgana apan gisingkahan sila.

Nabantayan nga nagsunod-sunod sa pagkalom-oy ang mga bata nga daw nasudla’g espiritu hinungdan nga nangahadlok g’yud ang ubang tinun-an.

Dunay pari nga mi-abot sa lugar ug nibendisyon niadtong mga nasudla’g espiritu. Wala g’yud maklaro ang gipangyawit sa mga nasudla’g espiritu kay pwerte’ng pagkaisoga.

Daghan ang mihimo’g mga pangadye samtang ang uban miitsa og asin sa mga nasudlan og espiritu. Nagtuo sila nga kun engkanto ang misulod sa mga tinun-an mahadlok kini sa asin.

Ang una nga nasudlan mao si Anne, 16, usa ka 4th year high school. Ang ubang tinun-an nangangkon nga nakakita sila og mga demonyo nga nagsul-ob og itum nga sapot, may sungay ug nagdala’g bangkaw.

Matud pa nga gipangita sa mga demonyo ang usa ka libro nga nawala nga posible’ng nalabay sa mga bata sa ilang pagpanglimpyo. Ang libro may marka nga “VOODOO,” libro sa pagpamarang nga gisunog sa mga estudiyante pipila ka adlaw na ang nakalabay.

Maestro Nasudlan Usab

Atol sa kaguliyang, usa ka maestro ang daw nasudlan ‘sab ug lain nga espiritu apan daw sa nangasaba sa mga bata sa ilang nahitabo.

Unang mihimo ang mga bata og usa ka ritwal nga daw sa Yoga ug kalit lang sila nakuyapan. Matud sa maestro nga mikalit ra gyud tong gibati naku, naglibog naku ug unsa to mga migawas nga akong gi-estorya.

Unom g’yud ka tinun-an, usa kanila babaye, ang nasudlan og espiritu. Gipangsiritan sila og mga Holy Water. Karong adlawa hayan ang mga tinun-an dad-on kang Msgr. Fred Kriekenbeek, ang pari nga naila nga suheto mobugaw og dautang espiritu.