Luna sa Compania Maritima, Giluwatan og Tax Declaration

Ang Cebu City Hall miisyu na g’yud og tax declaration sa kayutaan nga nahimutangan sa karaang building sa Compania Maritima ug sa palibot niini nga giangkon sa Cebu Port Authority.

Ang tax declaration nagpakita nga kapin sa upat ka hektareya nga yuta apil ang na-reclaim dihang gihimo ang sub-way tunnel nga anaa molagbas sa Plaza Independencia, gipanag-iya kini sa City of Cebu ug dili sa CPA.

Si Atty. Janeses “Jade” Ponce, executive assistant on legal matters ni Mayor Michael Rama, mibutyag nga wala na’y katungod ang CPA nga mangangkon nga sila ang tag-iya sa mao nga property.

Matud ni Ponce nga ang CPA wala gayo’y dukomento nga mapakita nga sila maoy tag-iya sa yuta mao nga ang Cebu City Assessor’s Office miluwat og tax declaration sa maong property.

Wala dayon kakuhai og pamahayag ang kadagkoan sa CPA kabahin sa labing ulahi nga kalamboan sa isyu.

Si Ponce nagkanayon nga kadtong mga tawo nga mobabag-babag sama sa pagdili nga maka-parking ang sakyanan sa maong dapit ilang ipadakup sa kapolisan.

Si Mayor Michael Rama mitugyan niining maong isyu ngadto nila ni Atty. Ponce ug ni City Administrator Jose Marie Poblete, apil na ni City Attorney Gerone Castillo.

Kabahin sa plano sa pipila ka commissioners sa CPA nga makigkita ni Rama aron hisgutan ang maong isyu, ang mayor miingon nga dili siya makapasalig nga atubangon niya ang maong mga opisyal.

Wala malipay ang mayor nga ang CPA mipabarug lang dayon og koral palibot sa property nga ilang giangkon nga walay permit gikan sa Office of the Building Officials (OBO).

Ang Section 301 sa Presidential Decree 1096 kon National Building Code of the Philippines naglatid g’yud nga ang mga ahensya ug buhatan sa kagamhanan, bisan ang mga Government-Owned and Controlled Corporations, dili “exempted” sa pagkuha og construction permit kon magtukod sila’g proyekto.

Apil gani nga gipatan-aw sa mayor ang pagkoral usab sa CPA sa Baclig Street, ang karsada nga nahimutang sulod sa port zone lumbay sa President Osmeña Avenue sa North Reclamation Area (NRA).