Lumulopyo sa Brgy. Bacayan, Gibahaan sa Libreng Serbisyo

Liboan ka mga lumulupyo sa Barangay Bacayan ang gibahaan sa mga libreng serbisyo atol sa ‘Piyesta sa Pagpangalagad’ kon ‘City Hall at Your Doorstep’ sa milabayng Biyernis, Hunyo 21, 2013.

Ang maong programa inisyatiba ni Re-elected Cebu City Mayor Michael Lopez Rama diin matag adlawng Biyernes ang batakang serbisyo sa nagkalain-laing departamento sa kagamhanan sa syudad sa Sugbo dal-on ngadto sa mga katawhan sa 80 ka Barangay ning syudad ilabina sa mga lagyong dapit.

Ang mga mibahang mga serbisyo naglangkob sa pagpang-ibot og ngipon; paghatag og libreng medisina; pagtanyag og mga rekisitos sa pagkuha og rehistro sa birth, marriage, ug death certificates; pag-isyu og cedula; pag-ayo sa mga gripo; pagpangtaod ug pag-ayo sa mga suga; paghatag og libreng seedlings nga itanumay; pagrehistro, bakuna og kapon sa mga iro, iring og mga kahayopan; screening sa jobs-fair og referral; pagtudlo paghimo og sabon; paghinlo sa mga drainage og kanal; og paghatag og mga impormasyon kabahin sa fire safety, traffic, kalihokan sa dakbayan, drug awareness, urban poor, legal nga tambag, libreng nutrition feeding, og uban pa.

Samtang mitanyag usab og dugang serbisyo ang Norks Learning Center ug ang Socializing of Informal Settlers Riverside Residences Association of the Philippines kon SISARRAP nga nagsaulog sa ilang ika-3 ka tuig nga anibersaryo atol sa maong kalihokan diin sila mitabang isip mga facilitators.

Mapasalamaton si Barangay Bacayan Kapitan Armando Borces kang Mayor Michael Rama gumikan sa kadasig ug tinguha niini nga maserbisyoan ang mga katawhang Sugbuanon. Matod pa ni Borces nga, “Gitagaan gyod ta ug higayon nga ang mga serbisyo sa city hall malakaw ra dinhi sa atong Sports Complex, dako atong pasalamat ni Mayor Mike Rama ug sa tanan nga mitambong ug mitabang sa atong kalihokan.”

Si Lyn Carreon, 32 ang edad usa sa natabangan sa ‘Piyesta sa Pagpangalagad’, mibutyag sa dihang gikahinabi sa taga BARUGG News nga: “Pasalamat mi ni Mayor Mike Rama kay naa ni nga medical mission, nalibre mi og pacheck-up sa akong 2 ka tuig nga anak nga gihilantan ug nalibre pod mi ug tambal.” matud pa ni Carreon.
(Ni: Greggy Jiggs P. Senados, PIO Staff)