Lumad-Basakanon,Placereño, Nanghawod sa Sinulog Grand Parade

Ang Sugboanong Lumad-Basakanon ug ang mga mananayaw gikan sa Masbate maoy nanghawod sa gipahigayong Sinulog Grand Parade karong tuiga pahinungod sa kapistahan ni Señor Santo Niño.

Sa makausa pa gipakita sa mga mananayaw sa Barangay Basak-San Nicolas nga dili sila mabintahaan sa pagsayaw bisan pa sa ubang mananayaw nga gikan sa ubang lugar sa nasud.

Ang Lumad-Basakanon maoy nahukman nga nakakuha sa first prize alang sa Free-Interpretation category ug sa Street Dancing category, samtang ang Kulturang sa Masbate mao usab ang first prize sa Sinulog-based category.

Si Mayor Michael Rama nahinangop kaayo nga ang Lumad-Basakanon maoy nakadaug sa Street Dancing ug Free-Interpretation bisan og kuwang sila og kagamitan alang sa pasundayag.

Matud ni Rama nga gitan-aw g’yud sa mga maghuhukom ang nindot nga pag-arte sa pagsayaw sa mga sakop sa Lumad-Basakanon. Ang mga maghuhukom nga giimbitar sa Sinulog Foundation Inc. dili taga Sugbo.

Gibutyag ni Dolly Suzarra nga maoy project director sa Sinulog Foundation nga ang mga judges sa dancing category nagagikan sa Cultural Center of the Philippines ug sa National Commission for the Culture and Arts, nga atua magbasi sa Manila.

Ang mga mananaug nga grupo pulos gihugyawan pag-ayo sa katawhan nga midayeg sa kaanindot sa ilang pagsayaw atubangan sa baga’ng duot sa katawhan nga misaksi didto sa Cebu City Sports Center niadong Dominggo kagahapon, Enero 19.

Ang mga mananaug sa Sinulog Grand Parade 2014 mao kini:

Best in Street Dancing

1st place: Lumad Basakanon, Brgy. Basak San Nicolas
2nd place: Sinanduloy Cultural Troupe, Tangub City
3rd place: Kulturang Placereno, Masbate

Free Interpretation Category

1st place: Lumad Basakanon, Brgy. Basak San Nicolas
2nd place: Tribu Himag-ulaw, Placer Masbate
3rd place: Abellana National School
4th place: Tribu Subanen, Plaridel Misamis Occidental
5th place: Banay Talambanon, Talamban Elementary School

Sinulog-based Category

1st place: Kulturang Placereno, Masbate
2nd place: Tribu Sinanduloy, Tangub City
3rd place: Municipality of Tuburan, Tuburan National High School
4th place: Carcar City Division
5th place: Talisay City Central Elementary School

Matud ni Mayor Rama nga hisgutan pa nila kon maayo ba nga pasalmoton nila ang Lumad-Basakanon sa Aliwan Festival sa Manila diin kaniadto nahimo na nga Hall of Famer ang tungod kay nahimo kini nga grand champion sa tulo ka sunod-sunod nga higayon.