LTO7: Balaodnon Ni Sotto, Lisud Ipatuman

Daghang tag-iya og motorsiklo dinhi sa Sugbo misaway ni Senador Vicente “Tito” Sotto tungod sa iyang pagsugyot nga ang motor dili na paangkasan gawas lang sa asawa ug sakop sa pamilya.

Usa kini sa natan-awan nga sulbad ni Sotto sa pagpanulis nga ang mga tulisan maglumon pagsakay og motorsiklo. Iyang gisugyot nga idili na ang pagpasakay sa motorsiklo gawas kun kabanay sa tag-iya’s motor.

Puwerte’ng bagolbol sa mga tag-iya’g motorsiklo dinhi sa dakbayan sa Sugbo kay gihulagway nila nga ang sugyot sa senador maisip nga makipobre abi kay siya makapalit man og mga sakyanan.

Si Sotto miingon nga sa iyang pagpanuki-duki nahibaw-an niya nga ang motorsiklo gitumong lang g’yud diay sa usa ka tawo, ug labaw na nga wala gitumong aron nga ipamasahero sama sa “habal-habal.”

Matud ni Sotto nga malipay siya kun saw-an kining mao nga isyu sa publiko aron mapaminaw niya kun unsay reaksyon sa katawhan aron basehan kun angayan ba nga himoan kini’g balaod.

Si LTO-7 Regional Director Arnel Tancinco miingon nga natan-aw niya nga lisod kaayo kini ipatuman ug makahurot kini’g oras sa mga road law enforcers nga dili na hinuon maatiman ang uban nga mga gimbuhaton.

Matud ni Tancinco nga gamay ra kaayo ang mga sakop sa LTO ug iyang giangkon nga dili gani sila makapatuman sa tanang lagda nga gilatid sa Transportation and Traffic Code.

Iyang gipasabot nga kun ang sugyot ni Sotto hugtan sa pagpatuman, langan kaayo kay ang mga road law enforcers mangayo pa man og birth certificates sa mga tawo nga nag-angkas sa motor aron sutaon kun kabanay ba kini sa nag-drive.

Matud sa opisyal sa LTO nga ang tukma mao nga hugtan ang kampanya sa pagpugong nga ang mga walay abilidad sa pagmaneho’g sakyanan kahatagan og lisensya.

Giangkon ni Tancinco nga usahay sayon ra ang paglukat og lisensya sa pagmaneho og sakyanan mao nga makita nga daghan kaayo ang mga drayber nga abusado diha sa kadalanan.