LTO: Tancinco Magpabilin sa Puwesto

Gipanghimakak sa labawng opisyal sa Land Transportation Office (LTO) ang nabaniog nga huhungihong nga hulipan na sa iyang katungdanan si LTO-7 Regional Director Arnel Tancinco.

Kini human mipagawas og pamahayag si LTO Assistant Secretary Alfonso Tan niadtong Biyernes nga si Tancinco magpabilin sa katungdanan.

Si Tan mitug-an nga natagbaw siya sa performance ni Tancinco kinsa gikatahong gikontrahan sa pipila ka mga kawani tungod kay wala makauyon sa gipatuman nga pipila ka mga kausaban sa buhatan sa LTO.

Matud ni Tan nga ang tanang gipatuman ni Tancinco nga mga kausaban sa LTO dinhi sa Central Visayas nagagikan sa iyang buhatan ug dili kay kaugalingon lang ni Tancinco.

Matud pa sa Luyo-luyong kalihim sa LTO nga dili tinuod nga si Tancinco hulipan ni Director Edgar Catarong sa Region 8 ug giklaro nga si Catarong magpabilin sa region 8 samtang si Tancinco magpabilin usab dinhi sa Central Visayas.

Tungod sa pamahayag ni Tan, si Tancinco nagpamasalamaton kaayo sa pagsuporta ni Tan sa iyang kasamtangan nga posisyon pinaagi sa pagtin-aw sa naasoy nga isyu.

Dugang pa ni Tancinco nga magpadayon siya sa paghimo og kausaban sa LTO nga imando sa ulohang buhatan kay iyang gilantaw usab ang mas epektibong serbisyo sa LTO ngadto sa katawhan sa tunga-tungang Kabisay-an.