LTO Nanakop sa mga ‘Colorum’

Ubay-ubay na ang nasikop sa mga otoridad sa Land Transportation Office (LTO)-7 nga mga colorum nga mga sakyanan nga nagkarga og mga utanon ug mga kahayopan gikan sa Mantalungon, Dalaguete.

Kini human ipatuman ni LTO-7 Regional Director Arnel Tancinco ang mando subay sa nahitabong disgrasya sa usa ka trak nga puno sa mga hayop didto sa Guadalupe, Carcar City nga mikalas og 9 ka kinabuhi ug miangol sa kapin sa 20 pa ka mga sakay niini.

Ang report sa buhatan ni Tancinco nagtumbok nga halos tanang mga pribadong sakyanan nga naghakot og mga hayop ug mga utanon pulos walay prangkisa hinungdan nga kini gipanakop.

Gawas sa naasoy nga kalapasan, nasayran usab sa LTO-7 nga gipaplete sa tag-iya sa trak ang mga negosyante apil na ang ilang kahayopan ug utanon.

Kini bisan pa man og wala kiniy pagtugot gikan sa Land Transportation Franchising and Regulatory Board (LTFRB)-7 nga makapamasahero.

Ang mga check point gipahigayon sa mga sakop sa LTO sa syudad sa Carcar diin nahitabo ang maong trahedya nga gikamatay sa ubay-ubay nga mga tawo.

Tungod sa subsob nilang operasyon, nasayran sa LTO-7 nga halos tanang mga trak nga gikargahan sa mga utanon ug mga hayop gikan sa tabo sa barangay Mantalungon lungsod sa Dalaguete.

Hinuon gipamulta ra og tag P6 mil ang mga nadakpan apan mosaka pa ang gidak-on sa maong multa sa higayon nga makalapas na usab kini sa mga lagda sa trapiko sa laing higayon.

Sayo niini, gitug-an ni LTFRB-7 Regional Director Ahmed Cuizon nga ang mga trak nga naningil og plete sa pasahero ug sa mga hayop ug utanon pulos walay prangkisa. Kini tungod kay ang Public Utility Jeepney (PUJ) lamang ang gihatagan og prangkisa sa ilang buhatan nga makahakot og mga pasahero ug walay labot ang pribadong trak.