LTO 7: Mando ni Rama Lisud Ipatuman

Ang labaw’ng opisyal sa Land Transportation Office (LTO) dinhi sa Central Visayas mitataw nga lisud ipatuman ang kamandoan ni Mayor Michael Rama nga dakpon kadto’ng mga drayber nga magpakusog pagpadagan diha sa SRP-Coastal Road kun walay speed gun ang mga traffic enforcers.

Si LTO-7 Regional Director Arnel Tancinco miingon nga walay lig-ong basihanan ang mga traffic enforcers sa pagdakop sa mga motorista bisan pa og ang ilang pagpadagan lapas na ang gikusgon sa 30 kilometros matag takna.

Ang CITOM walay “speed gun” aron magamit ug maoy mosukod ug morekord sa gikusgon sa sakyanan ug masuta kun nakalapas ba ang motorista sa gilatid nga speed limit.

Gusto ni Mayor Michael Rama nga kontrolahon ang dagan sa mga sakyanan nga moagi sa SRP-Coastal Road tungod sa sagunson nga aksidente nga nahitabo diha sa mao nga dapit ug daghan niini naglambigit og motorsiklo.

Matud sa mayor nga ang ubang aksidente nahitabo kay ang mga nagsakay og motorsiklo wala na makahinimbang sa pagpadagan ang drayber diha nga naagian og kusog kaayo’ng nagdagan nga sakyanan.

Gikan niadto’ng 2008, gikataho nga kapin sa 500 ka aksidente nga naglambigit og motorsiklo diha lang sa SRP.

Sa ubang kanasuran, ang ilang mga highway guards hitsas og speed gun nga magamit aron pagsukod sa gikusgon sa dagan sa mga sakyanan nga mosubay sa ilang highway.

Si Mayor Rama nangandoy nga unta adunay mga nagpakabana nga sibilyan o mga magpapatigayon nga modonar niini’ng mao nga kahimanan ngadto sa CITOM.