LTFRB: Ipaapil Ang Leksyon Sa Road Courtesy Sa Curriculum Sa Elementarya Ug Sekondarya

Gisugyot sa Land Transportation Franchising and Regulatory Board (LTFRB) nga i-apil sa curriculum sa mga estudyante sa elementarya ug high school ang leksyon sa road courtesy.

Sa sulat ni LTFRB Board Member Atty. Ariel Inton kang Department of Education (DepEd) Sec. Armin Luistro, miingon kini nga mahinungdanong itudlo gikan pa lamang sa pagkabata ang kamahinungdanon sa road courtesy ug road safety.

Matud pa ni Inton nga matag adlaw, mokabat sa liboan ang matalang traffic violations nga kadaghanan nagresulta sa aksidente ug grabeng paghuot sa trapiko.

Miingon usab si Inton nga kun may saktong edukasyon kalabot sa prinsipyo sa road courtesy, makuhaan ang problema sa kadalanan sa mga mosunod nga tuig.

Gipasabot ni Inton nga mahinungdanong ipasabot gayud sa mga bata ang importansiya sa road safety.

Giingong hangtud dili masabtan og maayo sa mga mosunod nga henerasyon ang sakto ug angay nga pamatasan sa kadalanan isip motorista ug pedestrian, magpabiling lisod sulbaron ang problema sa kadalanan apil na sa krimen. (ecb/PIA7-Bohol)